Մոսկվան ու Բաքուն տարբեր քաղաքական շահեր ունեն. Ադրբեջանում ՌԴ նախկին դեսպան

Ադրբեջանում Ռուսաստանի արդեն նախկին դեսպան Վլադիմիր Դորոխինն իր հրաժեշտի ելույթում շնորհակալություն է հայտնել ադրբեջանցի ժողովրդին դեսպանատան աշխատանքի նկատմամբ բարեկամական հետաքրքրվածության համար ու նշել է, որ Բաքուն ու Մոսկվան տարբեր քաղաքական շահեր ունեն, գրում է day.az-ը:

«Ռուսաստանն ու Ադրբեջանը տարբեր մասշտաբներով, մենթալիտետով, մշակույթով երկրներ են: Շատ հարցերում մենք տարբեր քաղաքական շահեր ունենք: Եվ, այնուամենայնիվ, մենք սովորել ենք իրար հետ հաշտ լինել»,- ասել է նա:

Դիվանագետը նաև նշել է, որ Ադրբեջան է ժամանել մոտ ինը տարի առաջ և ուներ հստակ քաղաքական հրահանգ՝ «ամեն կերպ ամրապնդել Ադրբեջանի հետ հարաբերությունները»:

Ավելի վաղ հաղորդվել է, որ Վլադիմիր Դորոխինը Ռուսաստանի նախագահի որոշմամբ հետ է կանչվել 2017 թվականի նոյեմբերի 27-ից, իսկ Բաքուն չի ընդունել Ռուսաստանի նոր դեսպանի թեկնածությունը՝ «հայամետ» դիրքորոշման պատճառով: