Ըստ քաղաքապետարանի տրամադրած տվյալների՝ շինարարական թույլտվության ժամկետի խախտման հոդվածքով 2025 թվականի փետրվարի 5-ին վարչական պատասխանատվության է ենթարկվել «Սոխոսենթր» ՍՊԸ-ն: Ըստ վարչական ակտի հիմնավորման՝ Կողբացի փողոց հ․36/3 հասցեում կառուցապատող «Սոխոսենթր» ՍՊԸ տնօրեն Հարություն Խաչատրյանին բազմաֆունկցիոնալ համալիրի կառուցման համար Երևան համայնքի կողմից 01․11․2023թ․ տրված հ․01/18-Դ-127350-2204 շինարարական թույլտվությամբ սահմանված է 3 ամիս ժամկետ, սակայն 10․12․2024թ․ կատարված տեղատեսությամբ պարզվել է, որ շինարարական աշխատանքն այս հասցեում փաստացի ավարտվել են, իսկ օբյեկտի շահագործման ընդունող հանձնաժողովի ակտը ձևակերպված չէ: Հիշյալ խախտման համար քաղաքապետարանը «Սոխոսենթր» ՍՊԸ-ին տուգանել է 39,6 մլն դրամով:
Նշենք, որ հիշյալ ընկերության հետ կապված դեռևս 2023 թվականին քրեական վարույթ էր հարուցվել: Գործով անցնում էին մշակույթի նախկին նախարար Հասմիկ Պողոսյանը, ՌԴ-ում և Իսրայելում Հայաաստանի նախկին դեսպան Արմեն Սմբատյանը, նրա որդին՝ դիրիժոր, Հայաստանի պետական սիմֆոնիկ նվագախմբի հիմնադիր Սերգեյ Սմբատյանը, ինչպես նաև գործարար Արման Պետրոսյանը։
Դեռևս նախորդ տարվա ապրիլին Երևան քաղաքի դատախազության և «Սոխոսենթր» ՍՊ ընկերության միջև կնքված հաշտության համաձայնությամբ՝ որոշվել էր Երևանի Կողբացի փողոցի 36/3 հասցեում կառուցված համալիրից 235,8 քմ մակերեսով տարածքը սեփականության իրավունքով փոխանցել Հայաստանի Հանրապետությանը՝ որպես «Սոխոսենթր» ՍՊ ընկերության կողմից չկատարված պարտավորության հատուցում։
Հաջորդ կառուցապատողը, որին քաղաքապետարանը պատժել է խոշոր տուգանքով, «Օլդ դեվելոփմենթ» ՍՊԸ-ն է, որն Արաբկիր վարչական շրջանում իրականացնում է մայրաքաղաքի խոշորագույն քաղաքաշինական ծրագրերից մեկը՝ «Կոմիտաս պարկ» բազմաֆունկցիոնալ բնակելի թաղամասի շինարարությունը:
Ըստ քաղաքապետարանի կայացրած վարչական ակտի՝ Գրիբայեդովի փողոց հ․48, հ․48/4 և Տիգրանյան փողոց հ․19/2 հասցեներում կառուցապատող «Օլդ դեվելոփմենթ» ՍՊԸ տնօրեն Լևոն Օրդուխանյանին բնակելի թաղամասի /1-ին փուլի՝ 1-ից 11-րդ մասնաշենքերի կառուցման համար Երևան համայնքի կողմից 29․12․2020թ․ տրված հ․01/18-122380-1824 շինարարական թույլտվությամբ սահմանված է 36 ամիս ժամկետ, սակայն օբյեկտի շահագործման ընդունող հանձնաժողովի ակտը ձևակերպված չէ նույնիսկ մեկուկես տարի անց: Նշված խախտման համար 2025թ. մարտի 10-ին ընկերությունը տուգանվել է խոշոր՝ 825 մլն դրամով:
Նշենք, որ Գրիբոյեդով 48 հասցեում կառուցվող «Կոմիտաս Պարկ» բազմաբնակարան շենքային համալիրը հանրային ծառայողներին մատչելի բնակարաններով ապահովման ծրագրի շրջանակում կառուցվում է պետական համակարգմամբ՝ բնակարանային շինարարությունը խրախուսելու և կառուցապատման ներդրումային ծրագրերի իրականացմանն աջակցելու նպատակով:
Այսպիսով կարելի է արձանագրել, որ Կառավարությունն ՝ ի դեմս Քաղաքաշինության կոմիտեի, ձախողել է պետական ծրագրի իրականացումը և կառուցապատողին տուգանելով՝ սնանկությանռիսկեր է ստեղծում մասնավոր կազմակերպության համար, այնդեպքում, երբ պետությունը իր մասնակցությունն ու պատասխանատվությունն ունի:
Շինթույլտվության ժամկետների խախտման երրորդ դեպքն արձանագրվել է այս տարվա ապրիլի 11-ին:
Ըստ քաղաքապետարանի տեղեկանքի՝ Ամիրյան փողոց հ․4/4 շենք հ․հ․25, 26, 27, 28, 29 բնակարան հասցեներում կառուցապատող «Գասպինվետ» ՓԲԸ տնօրեն Ապրես Գասպարյանին բազմաֆունկցիոնալ շենքի հարկերի ավելացման կառուցման համար Երևան համայնքի կողմից 14․11․2023թ․ տրված հ․01/18-Դ-132606-2355 շինարարական թույլտվությամբ սահմանված է 3 ամիս ժամկետ, սակայն օբյեկտի շահագործման ընդունող հանձնաժողովի ակտը ձևակերպված չէ 24․03․2025թ․-ի դրությամբ: Նշված խախտման համար ընկերությունը տուգանվել է 13,7 մլն դրամով:
Նկատնեք, որ 2023 և 2024 թվականների ընթացքում շինարարական թույլտվության ժամկետի խախտման հիմքով վարչական իրավախախտումների վերաբերյալ արձանագրություններ չեն կազմվել։
Համաձայն գործող իրավակարգավորումների՝ օրենսդրությամբ նախատեսված ժամկետներում (բացառությամբ գյուղական համայնքներում իրականացվող կառուցապատման և անհատական բնակելի տների) կառուցապատումը չավարտելու դեպքում իրավասու մարմինը կառուցապատողին գրավոր նախազգուշացնում է շինարարության թույլտվությամբ սահմանված ժամկետը երկարաձգելու և այդ ժամկետում կառուցապատումն ավարտելու կամ սեփականության իրավունքով իրեն պատկանող քաղաքաշինական գործունեության օբյեկտն օտարելու մասին: Կառուցապատողը նախազգուշացումը ստանալուց հետո մեկամսյա ժամկետում պարտավոր է դիմել իրավասու մարմին` շինարարության թույլտվության ժամկետը երկարաձգելու մասին հայտով:
Կառուցապատողի կողմից նախազգուշացումը ստանալուց հետո մեկամսյա ժամկետում շինարարության թույլտվության ժամկետը երկարաձգելու մասին հայտով իրավասու մարմնին չդիմելու, ինչպես նաև շինարարության թույլտվությամբ սահմանված նոր ժամկետում կառուցապատումը չավարտելու և սեփականության իրավունքով իրեն պատկանող օբյեկտը չօտարելու դեպքում շինարարության թույլտվություն տվող մարմինը նրան կրկին ենթարկում է վարչական պատասխանատվության և դիմում դատարան տվյալ օբյեկտը վաճառելու հայցով։
Իրավասու մարմնի կողմից շինարարության թույլտվությամբ սահմանված շինարարության տևողությունը կարող է երկարաձգվել ոչ ավելի, քան տվյալ օբյեկտի չիրականացված աշխատանքների համար շինարարության տևողության նորմերով հաշվարկված ժամկետի չափով: Կառուցապատողը պարտավոր է շինարարության թույլտվությամբ սահմանված նոր ժամկետում ավարտել կառուցապատումը կամ օտարել սեփականության իրավունքով իրեն պատկանող օբյեկտը:
Իսկ արդեն ավարտված շինարարության շահագործումը փաստագրելու նպատակով կառուցապատողը դիմում է իրավասու մարմնին` շահագործման ակտի ձևակերպման համար:
Հայաստանը հետաքրքրված է ԱՄԷ-ից բարձրորակ ապրանքների և առաջադեմ տեխնոլոգիաների ներկրմամբ
Ֆրանսիայի պատիվն է լինել այն երկրների կողքին, որոնք երբեք չեն դավաճանել իրենց, կանգնել արդար պայքարի...
Էմանուել Մակրոնը Ծիծեռնակաբերդի հուշահամալիրում հարգանքի տուրք մատուցեց Հայոց ցեղասպանության զոհերի ...
ԱՄՆ-ի գործողությունները Հորմուզի նեղուցում փակուղի են. Արաղչի
Մակրոնը և Սթարմերը Ուկրաինայի հարցով հանդիպում են հրավիրել
Իսպանիայի վարչապետի ինքնաթիռն արտակարգ վայրէջք է կատարել Թուրքիայում
Իմ բարեկամի՝ վարչապետ Նիկոլ Փաշինյանի հետ կամրագրենք ռազմավարական գործընկերությունը մեր երկրների միջ...
Վահագն Խաչատուրյանը և Նիկոլ Փաշինյանը պարգևատրվել են Ֆրանսիայի Պատվո լեգեոն-Մեծ խաչ շքանշանով, Մակրո...
Այս գագաթնաժողովը կհիշվի որպես խաղաղության գագաթնաժողով Կովկասում. Անտոնիու Կոշտա
Ջերմուկում հայտնաբերված կարմիրգրքյան գորշ արջի քոթոթները տեղափոխվել են ապաստարան․ ԲԸՏՄ