Մուհամմադ ալ Բաշիրը Սիրիայի անցումային կառավարությունը կղեկավարի մինչև 2025-ի մարտի 1-ը

Մուհամմադ  ալ Բաշիրը պաշտոնապես դարձել է Սիրիայի անցումային կառավարության ղեկավար:  Reuters-ի հաղորդմամբ՝ Բաշիրը կղեկավարի Սիրիայի անցումային կառավարությունը մինչև 2025 թվականի մարտի 1-ը:

Բաշարի թեկնածության վերաբերյալ որոշումը կայացվել էր այն բանից հետո, երբ զինված ընդդիմությունն ու իշխանությունները պայմանավորվել են իշխանության խաղաղ փոխանցման  և Սիրիայում քաոսից խուսափելու շուրջ:

Ալ Բաշիրը նախկինում աշխատել է որպես զարգացման և հումանիտար հարցերի նախարար Իդլիբում գտնվող Սիրիայի փրկության կառավարությունում:

Հիշեցնենք, որ նոյեմբերի 27-ին սիրիական ընդդիմադիր զինված խմբավորումների անդամները լայնածավալ հարձակում են սկսել Հալեպ և Իդլիբ նահանգներում կառավարական դիրքերի դեմ։ Դեկտեմբերի 7-ի երեկոյան Սիրիայի նախագահ Բաշար ալ Ասադի հակառակորդները գրավել են մի քանի խոշոր քաղաքներ՝ Հալեպը, Համան, Դեյր էզ Զորը, Դարաան և Հոմսը։ Կիրակի առավոտյան նրանք մտել են մայրաքաղաք Դամասկոս, որից հետո սիրիական բանակի ստորաբաժանումները լքել են քաղաքը։ Սիրիայի նախագահ Բաշար ալ Ասադը ներսիրիական բանակցություններից հետո լքել է պաշտոնը և երկիրը։