Իրավիճակը փրկելու փորձ՝ «Էրեբունի» թանգարանում

Yerkir.am-ը հոդված էր հրապարակել «Էրեբունի» պատմահնագիտական արգելոց-թանգարանում ստեղծված և նախադեպը չունեցող իրավիճակի մասին: Հայտնել էինք, որ ռազմավարական կարևորագույն նշանակություն և միջազգային լայն ճանաչում ունեցող այս հաստատությունը, որը, կարելի է ասել, Հայաստանի այցեքարտերից մեկն է, արդեն մեկուկես ամիս է, ինչ չուներ ո՛չ տնօրեն, ո՛չ փոխտնօրեն, ո՛չ էլ անգամ տնօրենի կամ փոխտնօրենի ժամանակավոր պաշտոնակատարներ: Կարճ ասած՝ արգելոց-թանգարանում տոտալ անտերություն էր տիրում: 

Քաղաքապետարանի մեր աղբյուրներն ասացին, որ հրապարակումը լուրջ իրարանցում է առաջացրել քաղաքապետարանում, ուստի որոշել են շուտափույթ կերպով նշանակել տնօրենի ժամանակավոր պաշտոնակատար, որպեսզի արտաքին շղարշ ստեղծեն, թե նշված հիմնարկում «արշալույսները խաղաղ են», և ամեն ինչ, իբր, բնականոն հունով է ընթանում:  

Նոյեմբերի 14-ին մեզ հետ կապ է նաև հաստատել արգելոց – թանգարանի Կարմիր բլուր մասնաճյուղի վարիչ Ծովինար Խաչատրյանը և հայտնել, որ արգելոց-թանգարանն արդեն  նոր ղեկավար ունի, իսկ մասնաճյուղերը բնականոն աշխատում են: 

Այսպիսով, նոյեմբերի 14-ին ստիպված, ճարահատյալ և շուտափույթ կերպով քաղաքապետարանից թանգարանի գլխավոր ֆոնդապահ Անահիտ Թելունցին նշանակել են արգելոց-թանգարանի ժամանակավոր պաշտոնակատար: Վերջինս վաստակաշատ կին է, երկար տարիներ աշխատել է կոնկրետ իրեն վերապահված ոլորտում, սակայն չունի վարչական աշխատանքի փորձ, թանգարանի զարգացման ծրագիր և այլն: Նրան առաջարկել են լինել տնօրենի ժ.պ., նա էլ ստիպված համաձայնել է: Եվ այդ ամենը զուտ այն բանի համար, որ քաղաքապետարանի համապատասխան վարչությունը գլուխն ազատի ավելորդ աղմուկից ու քաղաքապետի առաջ խայտառակվելուց, իսկ թանգարանի աշխատակիցները կարողանան աշխատավարձ ստանալ: Ավելին, եթե տնօրինության կողմից որևէ մեկը չստորագրեր, և անտեր վիճակը շարունակվեր, ոչ միայն աշխատավարձ չէին ստանալու, այլև անգամ թանգարանը ջեռուցում չէր ունենա:   

Yerkir.am-ը կարճ զրույց ունեցավ նաև «Էրեբունի» պատմահնագիտական արգելոց-թանգարանում  նորանշանակ ժ.պ. Անահիտ Թելունցի հետ:   

- Տիկի՛ն Թելունց, շնորհավորում ենք Ձեզ ժ.պ. նշանակվելու առիթով: 

- Շնորհակալ եմ: 

- Դուք ո՞ր օրն եք նշանակվել տնօրենի  ժ.պ.:

- Նոյեմբերի 14-ին: 

- Հրապարակում եղավ, որ հիմնարկում աշխատավաձերը չեն ստացել:

- Արդեն ստացել ենք, հենց նույն օրը՝ նոյեմբերի 14-ին, թանգարանի կումունալները ևս վճարել ենք, այսինքն, այդ բոլոր հարցերը կարգավորվել են: 

- Տիկին Թելունց, պատրաստվո՞ւմ եք դիմել և մասնակցել մրցույթի: 

- Ոչ, ոչ: 

- Դուք հայտնի, վաստակաշատ ֆոնդապահ եք, իսկ տնօրենի պաշտոնը  ենթադրում է ծանր վարչական աշխատանք:

  - Շատ ծանր է, ես գիտեմ:

- Այդ դեպքում ինչու՞ որոշեցիք դառնալ ժ.պ.: 

- Ըստ կարգի էդպես է, եթե տնօրեն-փոխտնօրեն չունենք, օրինակ, եղել է, որ տնօրեն-փոխտնօրենը երկրից բացակայել են, պարտականությունները դրվում է գլխավոր ֆոնդապահի վրա: Օրինաչափությունն էդպես է, ուզելու խնդիր չէ, կարգն է այդպես, մինչև մրցույթ լինի, և քաղաքապետարանը, որպես վերադաս, նշանակի իր կողմից ժամանակավոր կամ մրցույթ հայտարարի: 

-Հասկանալի է, իսկ Դուք «Էրեբունի» պատմահնագիտական արգելոց-թանգարանի զարգացման ի՞նչ ծրարգրեր ունեք: 

- Ես ոչ մի ծրագիր դեռ չունեմ, որոհվհետև խնդիրը մեր ցուցադրությունն է, որ հավաքված է, վերանորոգման առաջ ենք կանգնած, և դա քաղաքապետարանն էլ գիտի՝ պիտի լինի վերանորոգում, որ նոր ցուցադրություն լինի, թե չէ՝ էսպես թանգարանը կիսացուցադրությունով մի փոքր ժամանակավոր ունենք, և այդքանն է աշխատում: Ծրագիր չունենք, ծրագիրը միայն մրցույթով ցուցադրությունը վերականգնելը, վերանորոգելն է և աշխատելը: 

- Տիկին Թելունց, իսկ դուք Ուրարտուն ընդունու՞մ եք իբրև հայկական ժառանգություն:

  - Այո, միանգամայն:  -

Իսկ Էրեբունի – Երևան կապը՞, որը կարծես կասկածի տակ է դրվում:

  - Լրիվությամբ ընդունում եմ: Ինքս նաև բնիկ էրեբունցի եմ, և Էրեբունու բլուրը իմ բնակարանի կողքն է (ժպտում է):  

  - Շնորհակալ ենք, Ձեզ նոր աշխատանքում և այս փուլում հաջողություն ենք մաղթում: 

- Շնորհակալ եմ:

Հ.գ. Հետաքրքիր է՝ քաղաքապետ Տիգրան Ավինյանը տեղյա՞կ է, թե իրեն ենթակա Մշակույթի և տուրիզմի վարչությունը, որին ենթարկվում է «Էրեբունի» պատմահնագիտական արգելոց-թանգարանը, ինչպիսի «բարդակ» է ստեղծել այնտեղ, հաստատություն, որը հանդիսանում է Երևանի անձնագիրը, որտեղ պահվում է Երևանի, որպես Հռոմից էլ հին քաղաք լինելու եզակի ապացույցը՝ Արգիշտի թագավորի սեպագիր արձանագրությունը, և որի վրա հպարտորեն  ձեռքը դրել ու երդվել է ինքը՝ Տիգրան Ավինյանը: Ավելին, հարց տվե՞լ է քաղաքապետը, թե «Էրեբունին»  ինչու՞ խրվեց այդ ճահճի մեջ: