Ֆեթուլլահ Գյուլենին պատկանող ավիաընկերությունը հայ գործարարի աջակցությամբ է վաճառվել

Թուրքիայում ահաբեկիչ հռչակված Ֆեթուլլահ Գյուլենին պատկանող Bora Jet ավիաընկերության վաճառքի հետ կապված թուրքական դատախազությունը նոր հաղորդագրության հիման վրա հետաքննություն է սկսել։

Թուրքական Turkiye պարբերականի փոխանցմամբ՝ Անկարայի առեւտրի պալատի նախկին նախագահի փեսան՝ Բերեքեթ Օները դիմել է դատախազություն եւ պատմել, որ ինքը Bora Jet–ի նոր սեփականատեր Բառան Քորքմազի հետ ծանոթացա՝ միասին բիզնես անելու նպատակով։ «Լեւոն Թեմերջյան անունով մի ամերիկահայի հետ փորձեցինք գործ բռնել եւ մի քանի անգամ ԱՄՆ գնացինք։ Հերթական այցի ժամանակ Բառան Քորքմազն ինձ ասաց, որ ես մնամ իսկ ինքը Լեւոնի հետ պիտի գնա Գյուլենի հետ հանդիպելու։ Այդ հանդիպումը 2016–ի հեղաշրջման փորձից հետո էր։ Հետո ես իմացա, որ Գյուլենի տանը խոսակցություն է եղել Bora Jet–ը գնելու մասին, սակայն երբ Քորքմազն ասել է, որ իրենք այդքան գումար չունեն, Գյուլենի մարդիկ ասել են, որ Լեւոն եղբայրը այդ գումարը կտա մեզ»,–պատմել է Բերեքեթ Օները։

Նա նաեւ պնդել է, թե ինքը դեմ է եղել նման գործարքին, եւ Թուրքիա վերադառնալուն պես հետ է պահանջել գործում ներդրած գումարն ու դուրս եկել գործից, որից հետո դիմել է դատախազություն։ Բերեքեթ Օները պնդել է, թե իրականում Ֆեթուլլահ Գյուլենին պատկանող Bora Jet–ը ոչ թե վաճառվել է մի անձից մյուսին, այլ Գյուլենի մի գրպանից այդ գումարը դուրս է եկել ու մտել մյուս գրպանը։ «Այդ ընկերությունը Գյուլենի մարդիկ վաճառել են Գյուլենի այլ մարդկանց»,–ասել է նա։

NEWS.am