Աչքերի քրոնիկ հոգնածություն․ Ի՞նչ անեն համակարգչի առջև ժամեր շարունակ աշխատողները

Պատկերները ոչ հստակ տեսնելը, աչքերի հոգնածությունը և այլ խնդիրներ միշտ չէ, որ աչքի հիվանդությունների կամ վատ տեսողության հետևանք են: Հնարավոր է, որ առկա է աստենոպիա՝ աչքերի քրոնիկ հոգնածություն: Այս տերմինով ակնաբույժները բնորոշում են աչքերի հոգնածությունը, որն առաջանում է երկարատև և անդադար աշխատանքի հետևանքով: Աստենոպիայի նշանները մարդիկ հիմնականում զգում են գիրք կարդալիս, համակարգչի առջև աշխատելիս, երկար ժամանակ ղեկին լինելիս և այլն:

Այն տեսողական խնդիրները, որոնք պահանջում են բարձր կենտրոնացում, առաջացնում են աչքերի մկանների գերլարում և կծկում: Կոպերի, դեմքի, ծնոտի մկանները նույնպես ներառված են տեսողական գործընթացի մեջ և երբեմն առաջացնում են ցավ և անհարմարություն:

Մեծ դեր ունի նաև լուսավորությունը. աչքերը շատ շուտ են հոգնում թույլ լույսի տակ: Երբ մարդը լարված նայում է էկրանին, աչքերը քիչ է թարթում, այդ դեպքում աստենոպիան ուղեկցվում է նաև ակնագնդի չորությամբ:

Ընդհանուր առմամբ, աստենոպիայի ախտանշանները կարող են տարբերվել՝ կախված դրա առաջացման պատճառից, սակայն առավել հաճախ պատահող ախտանշաններն են՝

հոգնածություն,

աչքերում այրոց և ցավի զգացում,

չոր կամ արցունքոտ աչքեր,

գլխացավ, որն առաջանում է աչքերի հետ կապված որևէ աշխատանք իրականացնելիս,

աչքերը բաց պահելու դժվարություն,

պատկերի երկատվածություն,

գերզգայնություն լույսի նկատմամբ,

շաղված տեսողություն,

գլխապտույտ:

Այս ախտանշաններից շատերը կարող են նմանվել հեռատեսության, կարճատեսության կամ աստիգմատիզմի ախտանշաններին և իրական պատճառը հայտնաբերելու համար անհրաժեշտ է այցելել ակնաբույժի և անցնել աչքերի ընդհանուր հետազոտություն:

Աստենոպիայի բուժումը հիմնականում կախված է դրա պատճառներից և կարող է ներառել.

ակնոցի կրում,

կոնտակտային ոսպնյակների կրում,

լազերային միջամտության իրականացում,

աչքի կաթիլների օգտագործում:

Կան նաև աստենոպիայի մեղմացման այլ միջոցներ, որոնք կարող են իրականացվել տնային պայմաններում․

Մերսում․ Կոպերի և հոնքերի տակ իրականացվող շրջանաձև շարժումները (40 վայրկյան) ակտիվացնում են արյան շրջանառությունը և թուլացնում են մկանները:

Տաք ափ․ Շփեք ձեռքի ափերը և դրեք դրանք փակ կոպերին (կես րոպե):

Օգտագործեք սառը ջուր․ Սառը ջուրը հանում է աչքերի այտուցվածությունը, լարվածությունն ու հոգնածությունը, լավացնում է արյան շրջանառությունը:

Արևային լոգանք․ Էներգետիկ լիցքեր հնարավոր է ստանալ՝ դեմքը դեպի արևի ճառագայթներն ուղղելով: Այդ ընթացքում աչքերը պետք է փակված լինեն:

Վարժանքներ աչքի համար․ Դեպի հեռուն հառած հայացքը կամ մոտ դրված առարկային նայելը մարզում է աչքի մկանները:

Երիցուկի թեյով, կաթով, վարունգով թրջոցները նույնպես հանգստացնում են աչքերը:

Աստենոպիան, բարեբախտաբար, լուրջ խնդիր չէ և չի առաջացնում երկարատև տեսողական խնդիրներ: Պարզապես պետք է ավելի հետևողական լինել և շատ չծանրաբեռնել աչքերը, իսկ եթե դա անխուսափելի է, ապա աշխատել ընդմիջումներով: