ԼՂ խնդրի վերաբերյալ Օլանդի հայտարարությունն անհանգստացրել է Ադրբեջանին

Լեռնային Ղարաբաղի հակամարտության կարգավորման մասին Ֆրանսիայի նախագահ Ֆրանսուա Օլանդի հայտարարությունը լրջորեն անհանգստացրել է Բաքվին։
«Haqqin.az»–ի փոխանցմամբ՝ ադրբեջանցի պատգամավոր Ազայ Գուլիևն այսօր երկրի մեջլիսում կոչ է արել բողոքի նոտա հղել Ֆրանսիային:
Պատգամավորն ընդգծել է, որ հայկական կազմակերպությունների համակարգող խորհրդի ամենամյա ճաշկերույթի ընթացքում Օլանդն իր աջակցությունն է հայտնել ժողովուրդների ինքնորոշման սկզբունքին:
«Սա հայամետ քաղաքականության ակնհայտ դրսևորում է»,- նշել է Գուլիևը՝ ուշադրություն հրավիրելով նաև այն փաստին, որ ամենաշատը հենց Ֆրանսիայի ներկայացուցիչներն են այցելում Լեռնային Ղարաբաղ:
«Մենք չենք կարող բավարարվել հրադադարով, քանի որ դա լուծում չէ: Մենք պետք է հակամարտության կարգավորման համար իրական բանակցություններ սկսենք: Մեծ սխալ կլինի կարծել, թե իրավիճակը կայունացել է: Մենք պետք է անդրադառնանք հակամարտության կարգավորման տարրերին, որոնք արձանագրված են մադրիդյան սկզբունքներում: Մենք գիտենք նաև, որ երբ վերջիններս կիրառվեն, դրանք պետք է հիմնվեն Լեռնային Ղարաբաղի ինքնորոշման վրա, ուստի այս ճանապարհով առաջ շարժվելու համար Ֆրանսիան նոր հանդիպում կկազմակերպի Հայաստանի և Ադրբեջանի հետ»,–ասել էր Օլանդը հայերի հետ հանդիպմանը։

7or.am