Ինչ է կատարվում եվրոպական առաջնություններում

Եվրոպական ամենաուժեղ հինգ ֆուտբոլային առաջնություններում թեժ պայքար է ընթանում եւ արդեն իսկ պարզ է, թե որ թիմերն են պայքարելու չեմպիոնության եւ Չեմպիոնների լիգայի գոտում հայտնվելու համար, եւ որ ակումբներն են փորձելու տեղը պահպանել ուժեղագույնների խմբում:

ԱՆԳԼԻԱ

Անգլիայում տեղի ունեցած իններորդ տուրը նշանավորվեց Հենրիխ Մխիթարյանը «Մանչեսթեր Յունայթեդի» խայտառակ պարտությամբ առաջնության նորեկ «Հադերսֆիլդ Թաունից»: Մոուրինիոն իր անհասկանալի մարտավարությամբ եւ դժգույն խաղով վաղուց էր արժանի այս պարտությանը: Ի դեպ, Մխիթարյանը խաղադաշտ մտավ, երբ թիմն արդեն պարտվում էր 2:0 հաշվով:

«Չելսին», «Մանչեսթեր Սիթին», «Արսենալը» եւ «Տոտենհեմը» հաղթանակներ տարան, իսկ տոտենհեմցիները հաղթեցին սկզբունքային մրցակից «Լիվերպուլին»:

Եւ եթե չնախատեսված սենսացիոն իրադարձություններ տեղի չունենան, ապա արդեն իսկ այսօր կարելի է պնդել, որ չեմպիոն այս մրցաշրջանում դառնալու է «Մանչեսթեր Սիթին», եւ ոչ միայն այն պատճառով, որ երկրորդ տեղից առաջ է անցել հինգ միավորով, այլ որ ցուցադրում է գեղեցիկ եւ բոլոր թիմերից անհամեմատ ուժեղ ֆուտբոլ:

Անգլիայում ուժեղագույնների խմբում տեղը պահպանելու համար կպայքարի 7-8 թիմ, եւ նրանց շարքում Ուեյն Ռունիի նոր թիմը՝ «Էվերտոնը», որն այժմ 18-րդ տեղում է:

ԻՏԱԼԻԱ

Իններորդ տուրում ամենաառանցքայինը «Նապոլի»-«Ինտեր» հանդիպումն էր, որն անցավ դիտարժան պայքարում եւ ավարտվեց առանց խփած գոլերի: Իսկ ահա «Լացիոն», «Ռոման» եւ «Յուվենտուսը» հաղթանակներ տարան եւ մոտեցան առաջատարներին:

Եթե Անգլիայում կարող ենք պնդել, թե որ թիմը չեմպիոն կդառնա, ապա Իտալիայում թեժ պայքար է ընթանալու չեմպիոնության համար «Նապոլիի» եւ «Յուվենտուսի» միջեւ, որին կարող է միջամտել նաեւ «Ինտերը»: Այժմ «Նապոլին» վաստակել է 25, «Ինտերը»՝ 23, իսկ «Յուվենտուսն» ու «Լացիոն» 22-ական  միավոր:

Առաջնությունը չափազանց անհաջող է սկսել նորեկ «Բենեվենտոն»՝ ինը խաղ եւ ինը պարտություն: Ամենայն հավանականությամբ, այս թիմը չի կարող ամրապնդվել ուժեղագույնների խմբում: Թույլ են մեկնարկել նաեւ եւս վեց թիմ, որոնք վաստակել են 5-6 միավոր, որոնց թվում է նաեւ «Ուդինեզեն»:

ԻՍՊԱՆԻԱ

Այս երկրի առաջնությանը քաղաքականության միջամտությունը չափից դուրս մեծ է: Դեռ առաջնության ամենասկզբից ակնհայտ դարձավ, որ խնդիր է դրվել ամենաբարձր մակարդակով ապահովել «Բարսելոնայի» չեմպիոնությունը: Ինչո՞ւ, կհարցնեն շատերը: Պատասխանը պարզ է, «Բարսելոնայի» անհաջողությունն առաջնությունում կմեծացնի Կատալոնիայի անկախության կողմնակիցների թիվը, իսկ ֆուտբոլը, ավելի ճիշտ կատալոնյան թիմը, ըստ իսպանական իշխանությունների, կարող է դառնալ այն առանցքը, որը կարող է մեղմել անկախականների տրամադրությունները:

Առաջնության հենց սկզբից որոշեցին որակազրկել Ռոնալդուին հինգ խաղով, «Ռեալի» խաղը կոտրում էին մրցավարական անհեթեթ որոշումներով, իսկ ահա «Բարսելոնայի» մրցակիցները գրեթե չեն դիմադրում, իսկ ով փորձում է դիմադրել, արժանանում է մրցավարների պատժին: 

Այս տւորւմ «Մալագայի» դարպասը խփած «Բարսելոնայի» առաջին գոլը առաջնությունում կատարվող զզվելի իրադարձությունների մարմնացումն էր: Գնդակը մոտ մեկ մետր արդեն դուրս էր դիմային գծից, բայց մրցավարները դա չնկատեցին եւ թույլ տվեցին շարունակել խաղը եւ հաշվեցին գոլը:

Եթե ոչինչ չփոխվի Իսպանիայում, ապա «Բարսելոնային» չեմպիոն են հռչակելու, եւ այս իրավիճակում լրջորեն անդրադառնալ առաջնությանը, կարծում ենք, որեւէ իմաստ չունի: «Բարսելոնան» հիմա ամենաթույլն է վերջին տարիների համեմատ, բայց դա չի խանգարի այս թիմին դառնալու չեմպիոն:

ԳԵՐՄԱՆԻԱ

Գերմանական առաջնության առաջատար թիմերի խաղում այս տարի անկում է նկատվում, ինչն արտացոլվում է մրցաշարային աղյուսակում: «Բորուսիան», «Բավարիան» եւ «Լայպցիգը» առաջ են անցել մյուս թիմերից եւ կպայքարեն չեմպիոնության համար, չնայած անկայուն խաղ են ցուցադրում:

Այս մրցաշրջանում տեղը Բունդեսլիգայում պահպանելու համար կպայքարեն «Քյոլնը», «Վերդերը», «Համբուրգը», «Ֆրայբուրգը» եւ «Վոլֆսբուրգը»:

ՖՐԱՆՍԻԱ

Ֆրանսիայում երեկ կայացավ «Մարսել»-ՊՍԺ կարեւոր եւ հետաքրքիր հանդիպումը, որն ավարտվեց 2:2 հաշվով: Այս տարի ֆրանսիական առաջնությունն անհամեմատ հետաքրքիր է, քանի որ ՊՍԺ-ն շատ հաճախ լուրջ դիմադրության է հանդիպում, այսուհանդերձ, մեծ է հավանականությունը, որ Փարիզի թիմը կրկին չեմպիոն կդառնա:

ՊՍԺ-ն ինը տուրից հետո «Մոնակոյից» առաջ է անցել չորս միավորով, իսկ Ռանիերիի «Նանտից»՝ վեց միավորով:

Ի դեպ, Կլաուդիո Ռանիերին, որին հեռացրին «Լեսթերից», «Նանտին» դարձրել է ֆրանսիական առաջնության առաջատարներից մեկը, իսկ «Լեսթերը» պայքարում է տեղը Անգլիայի առաջնության Պրեմիեր լիգայում պահպանելու համար:

Top-News.am