Ծաղկաձորում անտառը սեփականաշնորհել է Զախարյանի եղբորորդին, ծառերն արմատախիլ են անում Սամվել Ալեքսանյանի դուստրը եւ փեսան
«Հետք»-ը օրերս քաղաքացիների ահազանգով Ծաղկաձոր քաղաքում ծառերն արմատախիլ անելու դեպք է արձանագրել։ Երկու էքսկավատորով արմատախիլ էին արվում սաղարթախիտ ծառերը, ճանապարհ էր բացվում։ Քանդված տարածքում տեղ-տեղ խոր փոսեր էին փորվել։
Նկարահանման ժամանակ մեզ մոտեցավ մի տղամարդ, հայտնեց, որ տարածքի սեփականատիրոջ՝ Դավիթ Դավթյանի մերձավորն է և ասաց, որ աշխատանքներ կատարելու թույլտվություն ունեն, տարածքը սեփականաշնորհված է։ Նա չներկայացավ։ Հարցրինք, թե ինչ թույլտվության մասին է խոսքը։ Վերջինս գնաց ու, որոշ ժամանակ անց վերադառնալով, բջջային հեռախոսով ցույց տվեց մի գրություն, ըստ որի՝ Ծաղկաձորի համայնքապետ Նարեկ Հարությունյանը չի առարկում սեփականատիրոջ՝ Դավիթ Դավթյանի առաջարկած աշխատանքների կատարմանը և առաջարկում է բնապահպանական և շրջակա միջավայրի պահպանման նորմերը չխախտելով՝ տարածքում կատարել էտում և բարեկարգում։ Այդ գրությունից պարզ չդարձավ, թե ինչի՞ն չի առարկում քաղաքապետը։
«Հետք»-ը պարզել է, որ 4 հեկտար անտառային տարածքը սեփականաշնորհել է Երևանի նախկին քաղաքապետ Երվանդ Զախարյանի եղբորորդին՝ Գագիկ Զախարյանը։ Տարիներ անց հողամասի սեփականության իրավունքը փոխանցվել է նախկին պատգամավոր, խոշոր գործարար Սամվել Ալեքսանյանի դստերն ու նրա ամուսնուն։
Դեռևս 2006 թ.-ին Կառավարության որոշմամբ պետական սեփականություն հանդիսացած 699 հեկտար հողամասն անհատույց սեփականության իրավունքով հատկացվել է Ծաղկաձոր համայնքին։ Նույն որոշմամբ այդ հողամասից 363 հեկտարի կատեգորիան գյուղատնտեսական նշանակությունից փոխվել է հատուկ պահպանվող տարածքների։ Զարմանալիորեն, Կառավարության այդ որոշման մեջ հողամասերի՝ անտառային լինելու մասին խոսք չկա, այն դեպքում, երբ տարածքում սաղարթախիտ անտառներ էին ։ Դա են վկայում արբանյակից արված լուսանկարները։
Ծաղկաձորին փոխանցված անտառապատ տարածքը ներառել է նաև այն 4 հեկտար տարածքը, որտեղ այս օրերին քանդման աշխատանքներ են տարվում։
Արդեն 2013 թ.-ին Ծաղկաձոր համայնքի ավագանու որոշմամբ թույլատրվել է հողամասի փոխանակում իրականացնել։ Այդ որոշմամբ Ծաղկաձորի Մհեր Մկրտչյան փողոց, թիվ 36 հասցեում գտնվող, Գագիկ Սայադի Զախարյանի սեփականությունը հանդիսացող 4 հեկտար (3,99 հա) հողամասը փոխանակվել է Օլիմպիական փողոց, թիվ 16 հասցեում գտնվող, Ծաղկաձոր համայնքին պատկանող նույն մակերեսով հողամասի հետ։ Գագիկ Զախարյանը նախկին պատգամավոր Սայադ Զախարյանի որդին է, իսկ Սայադ Զախարյանը Երևանի նախկին քաղաքապետ Երվանդ Զախարյանի եղբայրն է։
4 հեկտար անտառապատ տարածքի սեփականատեր Գագիկ Զախարյանը տարիներ շարունակ որևէ գործունեություն չի ձեռնարկել։ Հետագայում հողամասը վաճառել է նախկին պատգամավոր Սամվել Ալեքսանյանի ընտանիքին պատկանող «Ալեքս տեքստիլ» ՍՊ ընկերության տնօրեն Մարատ Մովսիսյանին։ Նա իր հերթին հողամասը փոխանցել է Սամվել Ալեքսանյանի դստերը և փեսային՝ Աստղիկ Ալեքսանյանին և Դավիթ Դավթյանին։ 2022 թ.-ին սեփականատերերը հողամասը 430 միլիոն դրամ վարկի դիմաց գրավադրել են «Արարատբանկում»։
Սամվել Ալեքսանյանի փեսան ՝ Դավիթ Դավթյանը, 2018 թ.-ին ստեղծված, կառուցապատմամբ զբաղվող «Արմ կոնստրակտ» ՍՊԸ-ի 100 % բաժնետերն է։ Այս ընկերությունն այժմ Երևանի Արաբկիր, Նոր Նորք և Մալաթիա-Սեբաստիա վարչական շրջաններում շենքեր է կառուցում։
«Չկա օրենսդրական որևէ կետ, որը կարող է արգելել սեփականատերերին իրենց տարածքներում աշխատանքներ կատարել։ Ձեր նշած տարածքը, որտեղ աշխատանքներ են իրականացվում, 4 հա մակերես ունի, որն ամբողջությամբ անտառածածկ է»,-նշեց համայնքի ղեկավարը։
Անդրադառնալով սեփականատիրոջ ներկայացուցչի՝ մեզ ցույց տված փաստաթղթին, Հարությունյանը նշեց, որ անտառը սաղարթախիտ էր, սեփականատերերը ճանապարհ չունեին անտառ մտնելու, ինքն էլ տրված գրությամբ չի առարկել, որ ճանապարհ բացեն և կոճղաշիվային էտում իրականացնեն։ Նրա խոսքով՝ տարածքում բազմահարկ շինություն չի կառուցվի։
Թեև Ծաղկաձորի քաղաքապետը պնդում է, թե լծակ չունեն մասնավոր սեփականություն հանդիսացող տարածքներում վերահսկողություն իրականացնելու, բայց օրենսդրությունը սահմանում է համայնքի ղեկավարի լիազորությունները եւ պարտականությունները։ Ըստ այդմ՝ քաղաքացիները սեփականության իրավունքով իրենց պատկանող հողամասերում կառուցապատման և քանդման աշխատանքներ կատարելու դեպքում պետք է ունենան համայնքի ղեկավարի թույլտվությունը։
Մենք արձանագրել ենք նաեւ, որ Ծաղկաձորի Օլիմպիական փողոց թիվ 16 հասցեի սեփականատերերը ճանապարհի հողային աշխատանքներից բացի՝ փոսեր էին փորել։
Բնապահպանության և ընդերքի տեսչական մարմնի Իրազեկման և հանրության հետ տարվող աշխատանքների բաժին պետ Նաիրա Աղաբաբյանը նշեց, որ երեկվանից, երբ «Հետքի» հրապարակման հիման վրա տեսչական մարմինը վարույթ է հարուցել, աշխատանքները տեղում դադարեցվել են եւ ապրիլի 19-ի դրությամբ չեն շարունակվել։ Վարույթը կարող է տևել մինչև 1 ամիս։
Մանրամասները՝ սկզբնաղբյուր կայքում
Մելանյա Թրամփը շարունակում է պնդել, որ իր որդուն դեռևս անհրաժեշտ է մշտական հսկողություն
ԱԱԾ տնօրենը հայտարարել է, որ Եզրաս արքեպիսկոպոս Ներսիսյանը եղել է ԽՍՀՄ ՊԱԿ գործակալ
Էս լրիվ գողական եք հա՞ գնում․ ԱԺ ում լարված մթնոլորտ է
Թբիլիսիում քննարկել են երաժիշտների իրավունքները, աշխատանքային պայմանները և մշակութային քաղաքականությ...
Որոշ տարածաշրջաններում ձյուն է տեղում․ Վարդենյաց լեռնանցքը, Սպիտակի ոլորանները, «Մեղրու սար» հատվածը...
Փարիզի Սամուելյանի Արևելյան գրախանութի աճուրդի հանված արժեքավոր որոշ գրքեր արդեն Հայաստանում են
Վահագն Խաչատուրյանը ներկա է գտնվել Համայն Վրաստանի կաթողիկոս-պատրիարքի հուղարկավորության արարողությա...
Մոսկվայի կենտրոնում բազմաբնակարան շենք է այրվել․ զոհեր և վիրավորներ կան
Երևանը միանում է «Երկրի ժամ» համաշխարհային բնապահպանական նախաձեռնությանը
Իրանում պատերազմը Հնդկաստանին կանգնեցրել է գազային ճգնաժամի առաջ