243 միլիոն դրամ հանգանակել են մանկապարտեզ նորոգելու համար․ փողի կեսից տեղեկություն չկա

Yerevan.today-ը գրում է. «Չորս տարի տևած վերանորգումից հետո օրեր առաջ վերջապես տեղի ունեցավ Մեղրիի մանկապարտեզի բացումը: Կարմիր ժապավենն էլ կտրեց Նիկոլ Փաշինյանի կինը՝ Աննա Հակոբյանը:

Մանկապարտեզը նորոգվել է համատեղ ֆինանսավորմամբ՝ գումարի 65 տոկոսը վճարել է կառավարությունը, մնացած 35 տոկոսը՝ «Իմ քայլը» հիմնադրամը: Հատկացումներն արվել են երկու փուլով: Մանկապարտեզի նորոգումը կառավարության սուբվենցիոն ծրագրերից մեկն էր:

Ընդհանուր առմամբ ծախսվել է 323 միլիոն դրամ, որից մոտավորապես 210 միլիոն դրամը հատկացվել է պետական բյուջեից, մնացած 113 միլիոնի ներդրումը հատկացրել է «Իմ քայլը» հիմնադրամը։

Մանկապարտեզի վերանորոգումը, սակայն, նախատեսված էր ավելի վաղ, բայց առաջացել էին ինչ-որ խնդիրներ կապալառու ընկերության հետ, շինարարության ձգձգման հարցը մինչ այժմ գտնվում է իրավապահների վարույթում: Թե ինչ կպարզվի արդյունքում, հայտնի չէ, բայց սա այս պատմության մեջ միակ ուշագրավ փաստը չէ:

Այսպես, չնայած Աննա Հակոբյանի գլխավորած հիմնադրամին վերջին շրջանում նվիրատվությունները հիմնականում արվում են անանուն և չի նշվում, թե ինչ նպատակով, բայց սկզբում ձևական մասը գոնե պահվում էր: «Իմ քայլը» հիմնադրամի նվիրատվությունների 2019 թվականի ցանկում նշված է 500 հազար դոլարի (243 մլն դրամ) անանուն նվիրատվություն՝ Մեղրիի մանկապարտեզի վերանորոգման համար:

Սակայն, ինչպես տեսանք, հիմնադրամը վերանորոգման համար ծախսել է հատկացվածի կեսից էլ պակաս՝113 միլիոն դրամ: Ինչո՞ւ է գումարը ծախսվել ողջ ամբողջությամբ, ո՞ւր է ուղղվել կոնկրետ նպատակի համար հատկացված գումարը, արդյո՞ք դոնորը տեղյակ է դրանից:

Այս հարցերը ուղղեցինք հիմնադրամի գործադիր տնօրեն Մխիթար Հայրապետյանին: Հայրապետյանը նշեց, որ անձամբ ճանաչում է նվիրատուին, կարծում է, որ խնդիր չի եղել, քանի որ նման դեպքերում տեղի է ունենում գումարի վերաբաշխում նվիրատուի համաձայնությամբ: Ամեն դեպքում նա խոստացավ անձամբ խոսել դոնորի հետ և տեղեկացնել վերաբերմունքի մասին:

Սպասենք Մխիթար Հայրապետյանի արձագանքին: Իհարկե՝ նաև ավելացնենք, որ Մխիթարյանը նույն ասուլիսի շրջանակներում խոսում էր այն մասին, թե ինչ կարևոր է հիմնադրամի թափանցիկությունը և ինչ առանցքային է, որ նվիրատուները իրենց վստահեն: Իսկ հարցին, թե ինչու են գնալով նվիրատվությունները դառնում անանուն, Հայրապետյանը պատասխանեց, որ դա նվիրատուների ցանկությունն է: Անձամբ իր կարծիքով պետք է բոլորը իմանան, քանի որ «Իմ քայլին» նվիրատվություն անելը ամոթ չէ:

Թե ինչու չեն ցանկանում, որ իրենց անունները հանրայնացվեն, դա էլ ուրիշ պատմություն է, բայց ստացվում է՝ գնալով նվիրատվություններն են դառնում անանուն, հանգանակության նպատակը չի նշվում, հետևաբար նաև հաշվետվողականությունն ու թափակցիկությունն է դառնում կասկածելի»։