Խելահեղ խաղեր եվրոպական առաջնություններում

Երեկ ֆուտբոլի եվրոպական առաջատար առաջնություններում կայացան հերթական հանդիպումները: Տեղի ունեցան մի շարք հետաքրքիր եւ դրամատիկ հանդիպումներ:

Անգլիա

«Լիվերպուլի» եւ «Մանչեսթեր Յունայթեդի» գերլարված հանդիպումն ավարտվեց առանց գոլերի, ինչից անմիջապես օգտվեցին «Մանչեսթեր Սիթիի» ֆուտբոլիստները, որոնք 7:2 հաշվով հաղթելով «Սթոք Սիթիին» դարձան միանձնյա առաջատարներ:

«Չելսին» երրորդ անգամ պարտվեց, այն էլ ումից՝ վերջին տեղում առանց միավոր եւ խփած գոլ ընթացող «Քրիսթալ Փելեսից»: Խաղն ավարտվեց 2:1 հաշվով: Դրամատիկ խաղում պարտվեց նաեւ «Արսենալը»՝ 2:1 հաշվով զիջելով «Ուոթֆորդին»: Ընդ որում, դաշտիօ տերերը հաղթական գոլը խփեցին ավելացված երրորդ րոպեին:

Պարտություններից հետո «Չելսին» եւ «Արսենալը» հայտնվեցին հինգերորդ եւ վեցերորդ տեղում, իսկ չորրորդ տեղ բարձրացավ «Ուոթֆորդը»:

Իտալիա

Իտալիայի առաջնությունում երեկ կայացավ երկու խաղ, երկու շատ կարեւոր եւ սկզբունքային խաղ: «Յուվենտուսը» ընդունեց «Լացիոյին» եւ հաղթում էր 1:0հաշվով, բայց Չիրո Իմոբիլեն երկու գոլ խձեց եւ առաջ մղեց իր թիմին: Խաղի ամենավերջում Դիբալան չկարողացավ գոլ շփել 11 մետրոնոց հարվածից եւ այս խելահեղ հանդիպումն ավարտվեց հյուրերի հաղթանակով:

«Նապոլին» էլ մրցակցի դաշտում 1:0 հաշվով հաղթեց սկզբունքային մրցակից «Ռոմային» եւ ամրապնդեց իր դիրքերն առաջին տեղում: Այս թիմն ունի 24 միավոր: «Յուվենտուսը», «Լացիոն» եւ «Ինտերն» ունեն 19-ական միավոր, բայց միլանցիներն ութերորդ տուրի իրենց հանդիպումն անցկացնելու են այսօր, այն էլ սկզբունքային եւ հավերժ մրցակից «Միլանի» հետ, որն ունի 12 միավոր: 

Ինչ վերաբերում է «Ռոմային», ապա նրանք մնացին նույն 15 միավորով: Ի դեպ, «Նապոլին» եվրոպական հեղինակավոր առաջնությունների միակ թիմն է, որը միավոր չի կորցրել:

Իսպանիա

Իսպանիայի առաջնության ութերորդ տուրում «Բարսելոնան» առաջին միավորները կորցրեց, Մադրիդում 1:1 խաղալով «Ատլետիկոյի» հետ: Ընդ որում, կատալոնացիները հաշիվը հավասարեցրին խաղավարտից ինը րոպե առաջ:

Մադրիդի մյուս թիմը՝ «Ռեալը» 2:1 հաշվով հաղթեց «Խեսաֆեին» եւ հայտնվեց երկրորդ տեղում, իսկ երրորդ տեղում «Ատլետիկոն» է: Կատալոնացիներն ունեն 22, «Ռեալը» 17, իսկ «Ատլետիկոն» 16 միավոր: Մադրիդյան թիմերին այսօր կարող է շրջանցել «Վալենսիան», եթե մրցակցի դաշտում կարողանա հաղթել «Բետիսին»:

Գերմանիա

Հայնկեսի ղեկավարությամբ առաջին խաղում «Բավարիան» 5:0 հաշվով հաղթեց «Ֆրայբուրգին»: Դորտմունդի «Բորուսիան» առաջին պարտությունը կրեց, սեփական դաշտում 3:2 հաշվով զիջելով «Լայպցիգին»: 

Այժմ «Բորուսիան» ունի 19 միավոր, «Բավարիան»՝ 17, իսկ «Լայպցիգը»՝ 16:

Ֆրանսիա

Ուրբաթ օրը «Լիոնը» գերլարված խաղում 3:2 հաշվով հաղթեց «Մոնակոյին»: Դաշտի տերերը հաղթական գոլը խփեցին միայն խաղի վերջին վայրկյաններին: 

Հերթական հաղթանակը երեկ տարավ նաեւ ՊՍԺ-ն՝ 2:1 հաշվով մրցակցի դաշտում հաղթելով «Դիժոնին», բայց հաղթական գոլը կրկին խփեցին խաղի ամենավերջում:

Հաղթանակ տարավ նաեւ «Սենտ Էտիենը», որը 3:1 հաշվով հաղթեց «Մետցին»:

ՊՍԺ-ն 25 միավորով վստահ գլխավորում է աղյուսակը եւ «Մոնակոյից» առաջ է անցել արդեն վեց միավորով: 17 միավորով երրորդը «Սենտ Էտիենն» է: «Լիոնը», «Մարսելը» եւ Կլաուդիո Ռանիերիի «Նանտն» ունեն 16-ական միավոր, ընդ որում, մարսելցիները դեռ այսօր պետք է խաղան իններորդ տուրի իրենց հանդիպումը եւ հաղթանակի դեպքում կհավասարվեն «Մոնակոյին»:

Top-News.am