Աշխարհի առաջնությունն առանց հոլանդացիների եւ չիլիացիների

Եվրոպայում եւ Հարավային Ամերիկայում ավարտվեցին ընտրական մրցաշարերը եւ արդեն իսկ պարզ է, որ ֆուտբոլի աշխարհի առաջնության եզրափակիչ փուլին չեն մասնակցի հոլանդացիները եւ չիլիացիները: Անշուշտ, առաջնությունն առանց հոլանդացի ֆուտբոլասերների եւ հոլանդիայի հավաքականի ավելի աղքատիկ կլինի: կորուստ է նաեւ Չիլիի բացակայությունը: Այժմ ամեն ինչ հերթով:

Եվրոպական առաջին խմբում, ինչպես եւ սպասվում էր առաջին տեղը զբաղեցրեց Ֆրանսիայի հավաքականը: Երկրորդ տեղը զբաղեցրին շվեդները եւ կմասնակցեն անցումային խաղերին, չնայած վերջին տուրում 2:0 հաշվով զիջեցին հոլանդացիներին, որոնք մնացին երրորդ տեղում, չնայած հավաքեցին նույնքան միավոր, որքան շվեդները:

B խմբում առաջին տեղն ի վերջո զբաղեցրեց Պորտուգալիան վերջին տուրում 2:0 հաշվով հաղթելով շվեյցարացիներին, որոնք կխաղան անցումային խաղերում՝ վիճարկելու համար մնացած չորս ուղեգրերից մեկը:

C խմբից աշխարհի առաջնության մասնակցելու իրավունք նվաճեցին գերմանացիները, իսկ հյուսիսիռլանդացիները կխաղան անցողիկ խաղերում:

D խմբում առաջին տեղը գրավեց Սերբիայի ազգային թիմը, իսկ երկրորդը՝ Իռլանդիայի հավաքականն է, որը վերջին տուրում մրցակցի դաշտում 1:0 հաշվով հաղթեց Ուելսի ընտրանուն:

E խմբում լեհերը վստահ զբաղեցրին առաջին հորիզոնականը, իսկ երկրորդ տեղը դժվարին պայքարում նվաճեցին դանիացիները: Ի դեպ, թե լեհերը, թե դանիացիները երկու խաղերում էլ հաղթեցին Հայաստանի ազգային հավաքականին, մեր թիմի դարպասն անցկացնելով 13 գնդակ:

F խմբում առաջինը Անգլիայի հավաքականն է, իսկ երկրորդը Սլովակիան, բայց ի տարբերություն մյուս խմբերում երկրորդ տեղը գրաված հավաքականների, սլովակներն անցումային խաղերին չեն մասնակցի, քանի որ երկրորդ տեղը զբաղեցրածինը թիմերից ամենավատ արդյունքն ունեն:

G խմբի հաղթողը Իսպանիայի ազգային հավաքականն է, իսկ իտալացիները ստիպվածկլինեն աշխարհի առաջնությանը մասնակցելու համար եւս երկու հանդիպում անցկացնել:

H խմբում բավական վստահ առաջին հորիզոնականը գրավեցին բելգիացիները, իսկ հույները ցույց տալով բավական թույլ ֆուտբոլ կարողացան զբաղեցնել երկրորդ տեղը: Բանն այն է, որ այս խումբը բավական թույլ էր: Բելգիացիների եւ հույների մրցակիցներն էին բոսնիացիները, էստոնացիները, կիպրոսցիները եւ ջիբրալթարցիները:

I խմբում առաջին հորիզոնականը զբաղեցրեց Իսլանդիայի հավաքականը եւ կմասնակցի աշխարհի առաջնությանը, իսկ ահա խորվաթները Մոդրիչի գլխավորությամբ դեռ կպայքարեն եզրափակիչ փուլին մասնակցելու համար:

Հարավային Ամերիկայից Ռուսաստանում կայանալիք աշխարհի առաջնությանը կմասնակցեն Բրազիլիայի, Ուրուգվայի, Արգենտինայի եւ Կոլումբիայի հավաքականները: Պերուն կմասնակցի լրացուցիչ անցումային խաղին: Իսկ ահա Ալեքսիս Սանչեսի Չիլին գրավեց վեցերորդ տեղը՝ վերջին տուրում 3:0 հաշվով պարտվելով Բրազիլիայի ազգային թիմից:

Top-News.am  

Այս թեմայով Մեկնարկում է ֆուտբոլի աշխարհի առաջնությունը Հայտնի է ֆուտբոլի աշխարհի առաջնության երաժշտական գործիքը (Տեսանյութ) Առաջինը Բրազիլիան է. ԱԱ եզրափակիչ փուլերի դասակարգման աղյուսակը Անգլիան չի բոյկոտի ֆուտբոլի աշխարհի առաջնությունը Ռուսներին բաժին հասան ամենաթույլ մրցակիցները․ վիճակահանությունը կայացավ