«Ո՞չ պադավատապետությանը». Կառավարությունը որոշել է 200 նոր ծառայողական ավտոմեքենա գնել, այդ թվում էլեկտրամոբիլներ

Կառավարությունը նախօրեի իր հերթական նիստում չզեկուցվող հարցերից մեկով սահմանեց ավտոմեքենաների ձեռքբերման առանձնահատկությունները, որով նախատեսվում է պետական մարմինների համար 200 նոր ավտոմեքենաներ ձեռք բերել եւ թարմացնել ավտոպարկը:

Նախագծում նշված է, որ նոր ծառայողական ավտոմեքենաները լինելու են էկոնոմ դասի ներքին այրման շարժիչով և էլեկտրամոբիլներ:

Որոշման հիմնավորման մեջ նշված է. «Նախատեսվում է տրանսպորտային միջոցների ձեռք բերման գործընթացում նախապատվությունը տալ էլեկտրոմոբիլներին, հաշվի առնելով այն հանգամանքը, որ դրանց ձեռք բերման արդյունքում կկրճատվեն տրանսպորտային միջոցների պահպանման ծախսերը և կմեղմացվի բացասական ազդեցությունը շրջակա միջավայրի վրա: Ավելին՝ նոր տրանսպորտային միջոցների ձեռք բերման գործընթացը կապահովի ՀՀ պետական կառավարման մարմիններին սպասարկող մեքենաների թվաքանակի զգալի կրճատում»:

2022 թվականի պետական բյուջեով՝ Հայաստանում ծառայողական մեքենաների թիվը 933 է։ Նախագծում հստակեցված չէ, թե նոր գնվող մեքենաներին զուգահեռ այս թիվը որքանով է կրճատվելու, հայտնի չեն նաև տեղեկություններ այն մասին, թե նոր մեքենաները որ կառույցների համար են գնվում, և պետական բյուջեից որքան գումար է դրանց համար վճարվելու։

Միայն նշվում է, որ ՀՀ սեփականությունը հանդիսացող չշահագործվող (անսարք կամ շահագործման համար ոչ պիտանի կամ դուրս գրման ենթակա կամ վթարված և վերանորոգման ոչ ենթակա և այլն) որոշակի քանակությամբ (շուրջ 600) տրանսպորտային միջոցներ հետ է վերցվել համապատասխան մարմիններից և ամրացնել Պետական գույքի կառավարման կոմիտեին՝ դրանք հետագայում օտարելու նպատակով, ուստի անհրաժեշտություն է առաջացել ՀՀ պետական մարմինների համար նոր տրանսպորտային միջոցներ ձեռք բերելու և ավտոպարկը թարմացնելու։ Նշենք, որ կառավարությունն ակնկալում է այդ մեքենաների օտարումից ստանալ մոտ 200 մլն դրամ: