Ֆրանսիայի հրապարակից բերման են ենթարկել Մոնթե Մելքոնյան ռազմական վարժարանի սան, 17-ամյա Աղասի Խաչատրյանին

Նախօրեին Ֆրանսիայի հրապարալից ծնողի ներկայությամբ բերման է ենթարկվել Մոնթե Մելքոնյանի սան, 17-ամյա Աղասի Խաչատրյանըին հունիսի 3-ին տեղի ունեցած միջադեպի հետ կապված: Այս մասին NEWS.am-ի հետ զրույցում ասաց Աղասի Խաչատրյանի փաստաբան Սերգեյ Հարությունյանը:

«Աղասիին բերման են ենթարկել տխրահռչակ զանգվածային անկարգություններ հրահրելու մեղադրանքով, Ֆրանսիայի հրապարակից ծնողի ներկայությամբ, տարել են մի քանի ոստիկանական բաժիններ, ապա բերել են քննչական : Ես եւ պատգամավորը փորձում էինք մտնել, մեզ սկզբում սպասեցրին, հետո հաջողվեց մուտք գործել, երեխային տեսանք, երեկ ձերբակալեցին, կարծում եմ, որ ինչպես բոլորի դեպքում իրեն նույնպես կցանկանան կալանավորել»,-ասաց նա:

Փաստաբանի խոսքով` հունիսի 3-ին Պռոշյան-Դեմիրճյան հատվածում միջադեի ժամանակ ոստիկանները ծեծի են ենթարկել նաեւ Աղասիին, որից հետո նա շիշ է նետել ոստիկանների ուղղությամբ. «Ոստիկանները ոչ մի պատասխանատվություն չեն կրում նրա համար որ բիրտ ուժ են կիրառում, այդ թվում կանանց եւ երեխաների նկատմամբ, բայց երեխային մեղադրում են երեխային, որ մի շիշ է շպրտել ծեծվելուց հետո անզորությունից ու զայրույթից, սա կարելի է ինքնապաշտպանություն են կոչում»:

Աղասիի հայրը` Տարոնիկ գյուղի նախկին համյանքապետ, 44-օրյա պատերազմի մասնակից Ալբերտ Խաչատրյանը մեզ հետ զրույցում պատմեց, որ իր որդուն իր ներկայությամբ են բերման ենթարկել 7-8 քաղաքացիական հագուստով անձիք:

«Մեզ նույնիսկ չթողեցին մոտենանք, ասացին` իր հետ բան կա պարզելու, մի քանի րոպե խոսացին, առանց ներկայանալու, առանց փաստաթուղթ ներկայացնելու, մեզ ասում են, որ երեխուն մեքենայով տանում են Մասիվի ոստիկանություն: Մասիվի ոստիկանությունում ասում են, որ նման անունով մարդ բերման չի ենթարկվել հետո ճշտում ենք ու իմանում, որ քննչական են տարել: Գնում ենք այնտեղ ու պարզվում է, որ երեխուն բերման է ենթարկվել ոստիկանների ուղղությամբ 2 շիշ շպրտելու համար»,-ասաց նա:

Աղասիի հայրը պատմեց, որ իր տղան Մոնթե Մելքոնյան ռազմական վարժարանի սան է, զղջում է իր արածի համար, սակայն այդ պահին ոստիկանների վայրագությունները տեսնելուց հետո զայրույթից է շշերը շպրտել:

«Իմ որդին հայրենասեր տղա է, չի ուզում, որ իր հրամանատարը թուրք լինի, ինքը զղջում է իր արածի համար, ես էլ չեմ արդարացնում իր արածը: Մենք ամբողջ ընտանիքով դեմ ենք, որ Արցախը հանձնվի, որի համար մենք պայքարել ենք եւ զուտ դրա համար է իմ տղան մասնակցում հանրահավաքներին: Իմ տղային այդ օրը ծեծել են ոստիկանները, հարվածել են վահաններով, մեջքին հետքերը երեւում են, շորերը ճղճղված են եղել, այդ ժամանակ ոստիկանները ծեծել են աղջիկներին ու կանանց, դրանից էլ երեխաս զայրացել է»,- պատմեց նա:

Ալբերտ Խաչատրյանը նշեց, որ ինքը անկուսակցական է, ինքը եւ իր 3 տղաները ունեն ՌԴ քաղաքացիություն, սակայն չեն պատրաստվում Հայաստանը լքել եւ իր որդիները նույնպես պետք է ապրեն Հայաստանում:

«Իմ երեխաները ու ես պետք է ապրենք անկախ, առանց թուրքի Հայաստանում, իմ երեխաները չեն գնալու թուրքի համար գառ պահեն»,-հավելեց նա:

Նշենք, որ երեկ ոստիկանությունը հայտարարություն էր տարածել, որ հունիսի 3-ին Երևանի Դեմիրճյան-Պարոնյան փողոցների խաչմերուկում անհնազանդության ակցիայի կազմակերպիչների հնչեցրած կոչերի հետևանքով, երբ ակցիայի մասնակիցները չեն դրսևորել իրավաչափ վարքագիծ, չեն ենթարկվել հասարակական կարգի պահպանություն իրականացնող ոստիկանության ծառայողների օրինական պահանջներին, բռնություն են գործադրել նրանց նկատմամբ և շշեր, քարեր ու մետաղե առարկաներ են նետել ոստիկանների ուղղությամբ, ուստի որոշում է կայացվել կիրառել հատուկ միջոցներ։ Կիրառվել են բացառապես լուսաձայնային հատուկ միջոցներ։ Արցունքաբեր և ծխարձակող հատուկ միջոցներ չեն կիրառվել։