Բուլղարիայի պաշտպանության նախարարն ազատվել է աշխատանքից․ նա չի ցանկացել Ուկրաինա ՌԴ-ի ներխուժումը պատերազմ անվանել

Բուլղարիայի վարչապետ Կիրիլ Պետկովը աշխատանքից ազատել է պաշտպանության նախարար Ստեֆան Յանեւին այն բանի համար, որ նա հրաժարվել է Ռուսաստանի ներխուժումն Ուկրաինա պատերազմ անվանել, հայտնում է Reuters-ը։

Պետկովն ասել է, որ կոալիցիոն կառավարությունը երեքշաբթի օրը խորհրդարանին կխնդրի հաստատել Յանեւի հրաժարականը եւ այդ պաշտոնում նշանակել Տոդոր Տագարեւին, ով 2013թ. պաշտպանության նախարարի պաշտոնակատար է եղել։

«Իմ պաշտպանության նախարարը չի կարող «պատերազմ» բառի փոխարեն «գործողություն» բառն օգտագործել։ Չի կարելի դա գործողություն անվանել, երբ երկու կողմերից հազարավոր զինվորներ են արդեն սպանվել»,- ասել է Պետկովը։

Նախագահ Ռումեն Ռադեւն ասել է, որ ռազմական ճգնաժամի պայմաններում պաշտպանության նախարարի փոփոխությունը ռիսկային է, եւ պատասխանատվությունն իշխող կոալիցիան կկրի:

Բուլղարիան պարտավորվել է ամրապնդել ՆԱՏՕ-ի արեւելյան թեւը եւ գլխավորել ՆԱՏՕ-ի հետ համագործակցությամբ մարտական խումբը, որը հիմնականում բուլղարական զորքերից է բաղկացած: Վերլուծաբաններն ասում են, որ Յանեւի փոխարինումը կարող է դրդել ՆԱՏՕ-ի դաշնակիցների ավելի շատ զորքեր տեղակայել Բուլղարիայում:

Իր ֆեյսբուքյան գրառման մեջ Յանեւը գրել է, թե ինքը նպատակաուղղված հարձակման թիրախ է դարձել, որի նպատակն է փոխարինել իրեն մեկով, ով ավելի բաց կլինի արտաքին շահերին համապատասխան որոշումներ կայացնելու համար, սակայն դրանք կարող են սպառնալիքի տակ դնել Բուլղարիայի անվտանգությունը։