Մեծ Բրիտանիան չեղարկում է «ոսկե վիզաների» ծրագիրը

Բրիտանական կառավարությունը հայտարարել է 1 մակարդակի ներդրողներին վիզաներ տալու ծրագրի չեղարկման մասին, հանվում է նաեւ, այսպես կոչված, «ոսկե վիզան», քանի որ մտահոգություններ կան, որ այն կարող է նպաստել խարդախությանն ու անօրինական ֆինանսավորմանը։

«Ներքին գործերի նախարարը վճռական միջոցներ է ձեռնարկել, որպեսզի փակի 1 մակարդակի ներդրողներին վիզա տրամադրելու ճանապարհը բոլոր ազգությունների հայտ ներկայացնողների համար»,- ասել են Մեծ Բրտանիայի ներքին գործերի նախարարությունում։ «Չնայած կատարվել է երթուղու բարելավման աշխատանք՝ չարաշահումները կանխելու նպատակով, բայց այսօր ներքին գործերի նախարարությունը այդ վիզաները փակելու միջոցներ է ձեռնարկել»։

Վիզան թույլ էր տալիս այն ունեցողներին եւ նրանց ընտանիքների անդամներին ժամանակավորապես բնակություն հաստատել Մեծ Բրիտանիայում, եթե նրանք երկրում մոտ 2 մլն ֆունտ սթեռլինգ ներդրում էին կատարել։

Մեծ Բրիտանիայի ներքին գործերի նախարար Փրիթի Փատելն ասել է, որ, փակելով 1 մակարդակի վիզաների ծրագիրը, հույս ունի, որ բրիտանացի քաղաքացիները կկարողանան վստահել երկրի իմիգրացիոն քաղաքականությանը։

Ինչպես տեղեկացնում է BBC-ին, այս որոշումը սպասելի էր, քանի որ բրիտանական կառավարության վրա ուժեղացվել էր ճնշումը՝ Ռուսաստանի հետ կապերը խզելու նպատակով։ Պարբերականը նշում է, որ 2008թ., ծրագրի մեկնարկման պահից, ռուսաստանցի քաղաքացիներին տրվել է 2 581 ներդրողական վիզա։