Իտալիայի դատախազությունը հետաքննություն է սկսել նախկին վարչապետի նկատմամբ

Իտալական հասարակական-քաղաքական «5 աստղեր» շարժման ղեկավար, նախկին վարչապետ Ջուզեպպե Կոնտեի տանը մի շարք խոշոր ընկերություններին Իտալիայի կառավարության նախկին ղեկավարի խորհրդատվական օգնության հետ կապված փաստաթղթեր են առգրավվել, հաղորդում է հռոմեական Domani թերթը:

Ըստ պարբերականի՝ Իտալիայի դատախազությունը փաստաթղթերի առգրավումը թույլատրել է կոռուպցիայի եւ խարդախության հետաքննության շրջանակներում։ Մի քանի շաբաթ առաջ գաղտնիության պայմաններում Իտալիայի ֆինանսական գվարդիան 300-400 հազար եվրոյի հաշիվ-ապրանքագրեր էր առգրավել, որոնք որպես վճար էին տրամադրվել Կոնտեի խորհրդատվական ծառայությունների դիմաց։

Հետաքննության ընթացքում պարզվել է, որ ընկերությունները, որոնց Կոնտեն ծառայություններ է մատուցել, պատկանում են իտալացի հայտնի գործարար Ֆրանչեսկո Բելլավիստա Կալտաջիրոնեին։ Դատախազությունը ձեռնարկատիրոջ դեմ գործ է հարուցել փաստաբան Պիերո Ամարայի ցուցմունքից հետո, այս պահին նա անազատության մեջ է՝ շինարարական խարդախության մեղադրանքով։

Իրավապահները կարծում են, որ Կալտաջիրոնեի ընկերությունները կապված են ձերբակալված Ամարայի հանցավոր սխեմաների հետ։ Դատախազությունը հետաքննության շրջանակներում փաստաթղթեր է առգրավել նաեւ ձեռնարկատիրոջն աջակցած եւս երեք փաստաբաններից։

Իտալիայի վարչապետ Ջուզեպպե Կոնտեն հունվարի 26-ին հրաժարական է տվել երկրում քաղաքական ճգնաժամի ֆոնին։ Կոնտեն պաշտոնից հեռանալու որոշման մասին հայտարարել էր հունվարի 26-ին Նախարարների խորհրդի նիստի ժամանակ։