Մարոկկոն նոր կանոններ է մտցրել երկիր եկողների համար

Մարոկկոյի կառավարությունը երեքշաբթի հրապարակել է համավարակի պայմաններում թագավորություն այցելելու նոր կանոնները, որոնք ուժի մեջ կմտնեն փետրվարի 7-ից։ Այս մասին ասվում է կառավարության մամուլի հաղորդագրությունում, տեղեկացնում է ՏԱՍՍ-ը։

Հունվարի 27-ին երկրի իշխանությունները որոշում են կայացրել բացել սահմանները եւ վերսկսել ուղեւորատար ավիահաղորդակցությունն արտաքին աշխարհի հետ փետրվարի 7-ից։ Այն դադարեցվել էր 2021թ. նոյեմբերի 29-ին՝ օմիկրոն շտամի տարածման հետ կապված։

Մարոկկոյի տարածքում հայտնվել ցանկացողները պետք է ներկայացնեն փաստաթուղթ պատվաստման մասին եւ ՊՇՌ թեստի բացասական պատասխան։ Թեստը պետք է արված լինի ինքնաթիռ նստելուց ոչ ավելի, քան 48 ժամ առաջ։ Բացի այդ, թագավորության յուրաքանչյուր օդանավակայանում վայրէջքից հետո ուղեւորները պետք է էքսպրես-թեստ հանձնեն։

Նոր որոշմամբ նախատեսվում է ՊՇՌ ընտրովի թեստավորում Մարոկկո եկած զբոսաշրջիկների համար։ Դրա համար կտեղադրվեն անհրաժեշտ սարքավորումներ, գործի կդրվեն մարդկային, բժշկական, վարչական եւ անվտանգային ռեսուրսներ։