Կառավարում արտասովոր ձեւաչափով. Առուշանյանը համայնքի ղեկավարի պարտականությունները կատարում է բանտից

Գորիսի խոշորացված համայնքի ղեկավար Առուշ Առուշանյանը «հեռավար» կառավարում է քաղաքը, չնայած այն հանգամանքին, որ գտնվում է անազատության մեջ: Այս մասին Այս մասին NEWS.am-ի հետ զրույցում ասաց Գորիս խոշորացված համայնքի ղեկավարի տեղակալ Իրինա Յոլյանը:

«Պարոն Առուշանյանը հիմնական որոշումներն ինքն է կայացնում, փաստաբանների միջոցով նամակագրական կապ կա եւ այդ նամակների միջոցով ինքը տեղյակ է եւ շինարարական ծրագրերին եւ ներդրումային ծրագրերին եւ ընդհանուր առմամբ աշխատանքներին: Ճիշտ է համայնքապետարանում բաժինները աշխատում են, բայց այն բոլոր հարցերը, որոնք կապ ունեն համայնքի ղեկավարի որոշումների հետ, բնականաբար ամեն ինչ իր նամակների միջոցով է իրականացվում: Աշխատակազմը այդ բոլոր հարցերը կազմակերպում է օրվա ընթացքում, կամ մի քանի օրվա կտրվածքով եւ իր անմիջական որոշումներով աշխատանքային ձեւակերպումները արդեն հստակ տրվում են»,- ասաց Յոլյանը` նշելով, որ հեռախոսային կապի հնարավորություն Առուշանյանի հետ իրենք մինչեւ հիմա չունեն:

Իրինա Յոլյանը գտնում է, որ Առուշանյանը պետք է անհապաղ ազատ արձակվի, քանի որ արդեն չկա այն միակ ցուցմունքը, որը նրա դեմ էր տրվել:

«Այդ ցուցմունք տվող Լուսինե Ավետյանը արդեն ներկայացրել է` որն է եղել կեղծ ցուցմունք տալու հիմքերը եւ բնական է, որ որեւէ իմաստ չկա Առուշանյանին անազատության մեջ պահել: Բայց քանի որ նախորդ նիստերի ժամանակ մենք տեսել ենք, որ ժամանակի վրա փորձում են երկարաձգել, այսինքն` այնպիսի ժամերի են նշանակում դատական նիստը, որ օրը ավարտվի եւ կարողանան երկարաձգել: Բոլորը սպասում են, որ դեկտեմբերի 27-ին Առուշանյանը պետք է ազատ արձակվի»,-ասաց նա:

Գորիսի համայնքապետ Առուշ Առուշանյանը կալանքի տակ է, նա մեղադրվում է համայնքի ընտրողներից առավելագույն քվեներ ապահովելու և ընտրություններում ցանկալի արդյունք արձանագրելու անձնական և խմբային շահերից ելնելով, ԱԺ արտահերթ ընտրությունների (որին ինքը մասնակցում էր «Հայաստան» դաշինքի ընտրական ցուցակով) նախընտրական քարոզարշավի ընթացքում ուղղակի դիտավորությամբ ծանր հանցագործություն նախապատրաստելու, այն է` ընտրություններին մասնակցելու և «Հայաստան» դաշինքի օգտին կողմ քվեարկելու համար երկու կամ ավելի ընտրողի կաշառք տալու մեջ՝ ՀՀ քրեական օրենսգրքի 35-154.2-րդ հոդվածի 4-րդ մասի 2-րդ կետով, 38-149-րդ հոդվածի 2-րդ մասի 4-րդ կետով և 38-154.2-րդ հոդվածի 3-րդ մասով:

Բացի այդ, ըստ մեղադրանքի, Առուշ Առուշանյանը Գորիս համայնքի Քարահունջ բնակավայրի վարչական ղեկավար Լուսինե Ավետյանի միջոցով կազմակերպել է նույն բնակավայրի ընտրողներին 2021 թվականի հունիսի 20-ին նշանակված ԱԺ արտահերթ ընտրություններին մասնակցելուն և «Հայաստան» դաշինքի օգտին կողմ քվեարկելուն հարկադրելը:

Առուշանյանն իրեն առաջադրված մեղադրանքը չի ընդունում։