Փաստաբանը նայելով դատավորի աչքերի մեջ ասաց. Ձեր՝ որպես դատավորի, նկատմամբ վստահություն չունեմ, համարձակություն չունեք կայացնելու որոշում, որը հաճո չէ իշխանությանը

Վերաքննիչ քրեական դատարանում՝ դատավոր Մհեր Արղամանյանի նախագահությամբ, մեկնարկել է Գորիսի համայնքապետ Առուշ Առուշանյանի նկատմամբ ընտրված խափանման միջոց կալանավորումն անփոփոխ թողնելու մասին որոշման դեմ բողոքի քննությունը։

Ինչպես արդեն տեղեկացրել ենք՝ Սյունիքի մարզի ընդհանուր իրավասության դատարանը՝ դատավոր Գնել Գասպարյանի նախագահությամբ, սեպտեմբերի 10-ին մերժել էր Առուշ Առուշանյանի նկատմամբ ընտրված խափանման միջոց կալանավորումը գրավով փոխարինելու մասին միջնորդությունը։

«Փաստինֆո»-ի թղթակցի հաղորդմամբ՝ դատական այսօրվա նիստին չի ներկայացել մեղադրող դատախազ Մուրադյանը՝ տեղեկացնելով, որ մասնակցում է վերապատրաստումների, սակայն չի առարկում, որ պաշտպանն այսօր կայացած դատական նիստին ներկայացնի իր բողոքը։

Դատական նիստին չի ներկայացվել նաև Առուշ Առուշանյանը։

Մինչ բողոքի բուն քննությանն անցնելը դատարանը քննարկման առարկա դարձրեց ինքնաբացարկի կամ բացարկի հարցը, սակայն միջնորդություն պաշտպանը չներկայացրեց, սակայն հայտարարեց, որ դատարանի նկատմամբ վստահություն չունի։

«Կարծում եմ՝ դատարանի համար գաղտնիք չէ, որ Ձեր՝ որպես դատավորի նկատմամբ, ես վստահություն չունեմ, որովհետև քաղաքական երանգ ունեցող քրեական գործերով Դուք չեք ունեցել համարձակություն՝ կայացնելու որոշում, որը կարող է հաճո չլինել իշխանություններին»,- նշեց փաստաբանն ու ավելացրեց, որ դա ասում է դատարանի աչքերին նայելով և վստահ է, որ այն, ինչ ինքը կասի դատարանում՝ դատարանին չի էլ հետաքրքրում, միայն խնդրում է իրեն 15 րոպե հանդուրժել, լսել իր բողոքը և կայացնել որոշումը, որն արդեն նախապես կայացրել է։

Հիշեցնենք, որ արտահերթ խորհրդարանական ընտրությունների ավարտից հետո հարուցվել էր քրեական գործ՝ «Հայաստան» դաշինքի օգտին քվեարկելու համար ընտրակաշառք տալու վերաբերյալ, ընդ որում, ըստ ՀՔԾ-ի, որպես ընտրակաշառք է ներկայացվել դրամական աջակցությունը։

Քրեական գործի շրջանակներում նախ՝ հուլիսի 5-ին ձերբակալվել էր Գորիս համայնքի Քարահունջ բնակավայրի վարչական ղեկավար Լուսինե Ավետյանը՝ ՀՀ քրեական օրենսգրքի 149-րդ հոդվածի 2-րդ մասի 2-րդ և 4-րդ կետերով, 149.1-րդ հոդվածի 2-րդ մասի 2-րդ կետով, 154.2-րդ հոդվածի 2-րդ մասով և 154.2-րդ հոդվածի 3-րդ մասով նախատեսված արարք կատարելու հատկանիշներով, ապա կալանավորվել, իսկ օրեր անց՝ դատախազի որոշմամբ գրավի դիմաց ազատ արձակվել։

Ընդ որում՝ մամուլում շրջանառվող տեղեկությունների համաձայն՝ Լուսինե Ավետյանը գործարքի է գնացել իրավապահ մարմինների հետ՝ ցուցմունք տալով Գորիսի համայնքապետ Առուշ Առուշանյանի դեմ, ինչի դիմաց ազատ է արձակվել։ Ավելին՝ Առուշանյանի դեմ ցուցմունք տալուց հետո Ավետյանի ազգականներից մեկն աշխատանքի է անցել դատախազությունում։ Ավետյանի ցուցմունքի հիման վրա Առուշ Առուշանյանին մեղադրանք է առաջադրվել ՀՀ քրեական օրենսգրքի 35-154.2-րդ հոդվածի 4-րդ մասի 2-րդ կետի, 38-149-րդ հոդվածի 2-րդ մասի 4-րդ կետի և 38-154.2-րդ հոդվածի 3-րդ մասի (քվեարկության գաղտնիությունը խախտելը, ընտրական իրավունքի իրականացմանը խոչընդոտելը) հատկանիշներով։

Առուշ Առուշանյանի նկատմամբ որպես խափանման միջոց է ընտրվել կալանավորումը։ Քրեական գործով նախաքննությունն ավարտվել է, գործն այժմ գտնվում է Սյունիքի մարզի ընդհանուր իրավասության դատարանի դատավոր Գնել Գասպարյանի վարույթում։