Ինչ ակնկալիք պետք է ունենանք Հայաստանի հավաքականից

Վաղը՝ սեպտեմբերի 1-ին՝ ժամը 22:45-ին՝ Ռումինիայի մայրաքաղաք Բուխարեստում տեղի կունենա Աշխարհի ֆուտբոլի 2018 թվականի առաջնության Ռումինիա-Հայաստան հանդիպումը, իսկ արդեն սեպտեմբերի 4-ին՝ ժամը 20:00-ին Երեւանում Հայաստանը կընդունի Դանիայի հավաքականին, տեղեկացնում է Հայաստանի ֆուտբոլի ֆեդերացիայի պաշտոնական կայքէջը։

Նշենք, որ մրցաշարային աղյուսակում Դանիան 10 միավորով երկրորդն է, Հայաստանի Ռումինիայի հավաքականները 4-րդ եւ 5-րդ տեղերում են՝ 6-ական միավորով:

Իսկ ի՞նչ ակնկալիք կարող ենք ունենալ Հայաստանի ազգային հավաքականից: Լինենք անկեղծ մինչեւ վերջ՝ ոչ մի: Մեր ակնկալիքը, եթե կարելի է այդպես ասել, միայն Ռումինիայի հավաքականից է: Այլ կերպ ասած, հրաշքով ոչ-ոքի կարելի է կորզել, եթե ռումինները չափից ավելի վատ խաղան:

Հիմա կասեք իսկ Հենրիխ Մխիթարյանը: Իսկ ինչ արեց Մխիթարյանը Չեռնոգորիայի դեմ խաղում, եւ ինչ կարող էր անել: Ինչ անի Մխիթարյանը, եթե դարպասին դարպասապահ չունենք եւ գնդակը ցանցում հայտնվում է այնքան, որքան մրցակից ֆուտբոլիստները հարվածում են մեր դարպասին:

Ինչ անեն Մխիթարյանը եւ Պիզելին, եթե կազմը ընտրում է ոչ թե գլխավոր մարզիչը, այլ ՀՖՖ նախագահը: Ոմանք կշտապեն ասել, թե դա այդպես չէ: Իսկ եթե այդպես չէ, ինչու հավաքական չի հրավիրվել հրաշալի մարզավիճակում գտնվող Յուրա Մովսիսյանը:

Եւ վերջին հաշվով, նրանք, ովքեր մտածում են, որ մեր հավաքականը կարող է հաջող հանդես գալ Բուխարեստում, թող վերցնեն հավաքական հրավիրված ֆուտբոլիստների ցանկը եւ մի լավ ուսումնասիրեն, հետո նոր մտածեն ակնկալիքների մասին:

Ոչ Արթուր Պետրոսյանը, ոչ էլ որեւէ այլ մարզիչ, այդ թվում Զիդանն ու Անչելոտին միասին վերցրածՀայաստանի հավաքականում դրական փոփոխությունների չեն հասնի, եթե հավաքականի կազմը շարունակի որոշել ՀՖՖ նախագահը:

Top-News.am