Հայիթիում երկրաշարժի հետևանքով զոհերի թիվը մոտեցել է 2000-ի

Հայիթիում շաբաթ տեղի ունեցած երկրաշարժի հետևանքով զոհերի թիվը վերջին տվյալների համաձայն հասել է 1941-ի: Այս մասին հայտնում է BBC News-ը՝ հղում անելով տեղի պաշտոնյաներին:

Շուրջ 10 000 մարդ վնասվածքներ է ստացել, շատերը դեռ անհետ կորած են համարվում օրեր առաջ տեղի ունեցած 7,2 մագնիտուդ ուժգնությամբ երկրաշարժից հետո:

Փրկարարական աշխատանքները բարդացել են հորդառատ անձրևների պատճառով: ՄԱԿ-ի տվյալներով՝ մոտ 500 000 երեխա ներկա պահին կացարանի, անվտանգ խմելու ջրի և սննդի հասանելիություն չունեն: Բազմաթիվ ընտանիքներ երկրաշարժի հետևանքով կորցրել են ամեն ինչ, և այժմ հայտնվել են հեղեղատներում:

Տասնյակ հազարավոր մարդիկ անօթևան են մնացել և չեն կարող վերադառնալ անգամ երկրաշարժի հետևանքով կիսաավեր դարձած իրենց տներ: Հիվանդանոցներից շատերը նույնպես ծանրաբեռնված են և սարքավորումների կարիք ունեն, մինչ բժիշկները փորձում են օգնություն ցույց տալ վիրավորներին:

Աղբյուրը՝ tert.am