Ադրբեջանի նախկին դեսպանը տեսախցիկի առաջ ռուսներին խոզեր է անվանել. Պետդումայի փոխխոսնակը զգուշացրել է հետևանքների մասին

Պետդումայի փոխխոսնակ Պյոտր Տոլստոյը զգուշացրել է ռուսներին վիրավորած ադրբեջանցի նախկին դիվանագետին հետեւանքների մասին, հայտնում է «ՌԻԱ Նովոստի»-ն:

«Ադրբեջանի նախկին դեսպանը տեսախցիկի առաջ ռուսներին խոզեր է անվանել: Դիվանագետը, թեեւ նախկին, հիանալի զգում է, թե ինչ է կարելի և ինչը՝ ոչ: Հետևանքներից չի վախենում ո՛չ նա, ո՛չ նրանք, ովքեր ազգային հանրապետություններում, որոնք Ռուսաստանի բարի կամքով դարձել են երիտասարդ, բայց ոչ անկախ պետություններ, այսօր վիրավորում են Ռուսաստանին և ռուսներին»,- գրել է պատգամավորը Telegram ալիքում:

Նա նշել է, որ պետք է ներողություն խնդրել հայտարարությունների համար, կամ «հետեւանքներ կլինեն»:

Տոլստոյը շեշտել է, որ մեկ անձը կարող է ներել մեկ ուրիշին, սակայն հավատքին և ժողովրդին ուղղված վիրավորանքը կմնա երկու երկրների հարաբերությունների պատմության մեջ:

Ավելի վաղ սոցիալական ցանցերում տարածվել էր մի տեսանյութ, որում մի տղամարդ, ով ներկայացել էր որպես Բելառուսում, Մոլդովայում և Պակիստանում Ադրբեջանի նախկին դեսպան Իսֆանդիար Վահաբզադե, վիրավորում է Ռուսաստանի Լիբերալ-դեմոկրատական ​​կուսակցության առաջնորդ Վլադիմիր Ժիրինովսկուն և «ռուս ազգին»:

Ադրբեջանի ԱԳՆ-ն հրաժարվել է մեկնաբանել Վահաբզադեի հայտարարությունը՝ հայտնելով, որ նա ազատվել է աշխատանքից 5 տարի առաջ, իսկ այսօր չի ներկայացնում ԱԳՆ-ն: