Պղինձը առաջին կիսամյակում թանկացել է մոտ 21 տոկոսով

Պղնձի արժեքը փոքր-ինչ նվազում է, ընդ որում՝ 2021թ. վեց ամիսների արդյունքներով մետաղը թանկացել է մոտ 21 տոկոսով, վկայում են սակարկությունների արդյունքները։

Պղնձի սեպտեմբերյան ֆյուչերսների արժեքը Comex բորսայում նվազել է 0,04 տոկոսով՝ մինչեւ մեկ ֆունտը (մոտ 0,45 կիլոգրամ) 4,2565 դոլար։

Երեքշաբթի օրվա արդյունքներով՝ Լոնդոնի մետաղների բորսայում (LME) մեկ տոննա պղնձի արժեքը՝ երեք ամիս հետո մատակարարմամբ, նվազել է 0,57 տոկոսով՝ մինչեւ 9334,5 դոլար, ալյումինիումինը բարձրացել է 2,47 տոկոսով՝ մինչեւ 2551,5 դոլար, ցինկինը՝ 1,57 տոկոսով՝ մինչեւ մեկ տոննան 2950,5 դոլար։

Ընթացիկ տարվա առաջին կիսամյակում պղնձի արժեքը աճել է 20,8 տոկոսով, իսկ երկրորդ եռամսյակում՝ 6,5 տոկոսով։

2021թ. հումքային ակտիվների, մասնավորապես՝ մետաղների պահանջարկը ակտիվորեն բարձրանում է տնտեսական ակտիվության վերականգնման ֆոնին։ Սակայն երկրորդ եռամսյակում պղնձի գնանշումների աճը զսպվել է դոլարի փոխարժեքի ամրապնդմամբ ԱՄՆ Դաշնային պահուստային համակարգի հունիսյան նիստից հետո։ Նիստի արդյունքներով՝ կարգավորողը ներկայացրել է տոկոսադրույքի հնարավոր բարձրացման կանխատեսումներն ավելի վաղ, քան սպասվում էր։