Ընդդիմադիր հայացքներ ունեցողներին պարտադրում են դիմում գրել-հեռանալ

«Հրապարակ» թերթը գրում է. «ՊԵԿ նախագահ Էդվարդ Հովհաննիսյանը, որը պետական ապարատի ոչ ՔՊ-ական պաշտոնյաներից ամենաքաղաքականացվածն ու ամենանիկոլականը դուրս եկավ, որոշել է քաղաքական դրդապատճառներով կադրային ջարդ իրականացնել Պետեկամուտների կոմիտեում։ Մեզ ասացին, որ ընտրություններից հետո Էդվարդ Հովհաննիսյանը հավաքել է իր աշխատակիցներին եւ հիշեցրել, որ ինքը դեռ ընտրություններից առաջ հորդորել էր քաղաքական լոյալություն պահպանել։ «Բայց դուք իմ հորդորը չեք լսել, ուստի խորհուրդ կտամ՝ նրանք, ովքեր չեզոք չեն եղել, դիմում գրեն-ազատվեն աշխատանքից»․ այսպես փոխանցեցին մեզ ՊԵԿ նախագահի բառերն իր աշխատակիցների հետ հանդիպումից։

Իսկ ՊԵԿ-ում բավականին շատ են ընդդիմադիր հայացքներ ունեցող աշխատակիցները, որոնք զզվել են Նիկոլ Փաշինյանի կառավարության անլուրջ ու պետականաքանդ գործունեությունից եւ չեն էլ թաքցնում իրենց վերաբերմունքն այդ հարցում։ Բայց զարմանալին այստեղ այն է, որ քաղաքական չեզոքությունից է խոսում մի մարդ՝ ՊԵԿ նախագահ Էդվարդ Հովհաննիսյանը, որն ինքն է բացահայտ խախտում քաղաքական լոյալությունը՝ մասնակցելով Նիկոլ Փաշինյանի կազմակերպած միտինգներին, հրապարակավ հայտնում, որ իր ձայնը ՔՊ-ին էր տալու, զբաղվում ՔՊ-ի օգտին քարոզչությամբ, եւ այսպես շարունակ։ Նրա համար, փաստորեն, քաղաքական չեզոքությունն ընդդիմադիր հայացքներ ունենալն է, իշխանական լինելը կամ համակարգի ծառա լինելը չեզոքության խախտում չէ։

Մեր տեղեկություններով՝ թիրախավորված են մի խումբ աշխատակիցներ, որոնց մի մասին ասվել է՝ դիմում գրել-հեռանալ, մյուսներին առաջիկայում են ասելու։ Նրանք են ՊԵԿ Մաքսանենգության դեմ պայքարի վարչության Շիրակի բաժնի պետ Բաբկեն Կարախանյանը։ Նրա անունը, ըստ որոշ տեղեկությունների, իմքայլական պատգամավոր Նազելի Բաղդասարյանն է անձամբ Նիկոլ Փաշինյանին ներկայացրել՝ որպես ազատման ենթակա պաշտոնյա։

Իր վերադասի՝ ՊԵԿ մաքսայինի գծով փոխնախագահ Շուշանիկ Ներսիսյանի կողմից նույն պահանջը ներկայացվել է նաեւ «Զվարթնոց» օդանավակայանի մաքսային ծառայությունում բաժանմունքի պետ Սամվել Հակոբյանին, որի մասին ասում են, որ ծառայության լավագույն աշխատակիցներից է, բայց քանի որ Շիրակի նախկին մարզպետ Աշոտ Գիզիրյանի փեսան է, հետեւաբար ասել են՝ դիմում գրի-գնա։ Գիզիրյանը, հիշեցնենք, ընտրություններին Ռոբերտ Քոչարյանի գլխավորած «Հայաստան» դաշինքի Շիրակի մարզի պատասխանատուն էր։

Այլ անուններ եւս կան թիրախում։ Օրինակ՝ վարչություններից մեկի պետի տեղակալ Վահագն Սահակյանը բացահայտ աջակցում էր իր ազգական Վահրամ Գուրօղլյանի գերդաստանին, որոնք բացի Քոչարյանի շտաբներում ակտիվ աշխատելուց, պատասխանատու էին նաեւ Պարոնյան-Լուսավորիչ հատվածի համար։ Հայկ Մեղրյանին՝ Շահեն Մեղրյանի եղբոր՝ Պետրոս Մեղրյանի որդուն, ով ներքին անվտանգության վարչության պաշտոնյա է։ Իսկ Պետրոս Մեղրյանն ակտիվորեն մասնակցում էր Քոչարյանի կազմակերպած միտինգներին, նաեւ ընդգրկված էր «Հայաստան» դաշինքի նախընտրական ցուցակում։ Նրա որդին էլ՝ Ֆրիդոն Մեղրյանը, քաղաքական հողի վրա ազատվել է Կոտայքի ԴԱՀԿ ծառայության պետի պաշտոնից՝ Քոչարյանի ցուցակում հոր ընդգրկվելուց հետո։

Նոր Նորքի տարածքում հարկային ծառայող, տարբեր ժամանակներում պետի տեղակալի պաշտոն զբաղեցրած Տիգրան Հարոյանը եւս այս ցուցակում է։ Նա էլ էր ընդդիմության միտինգների ակտիվ մասնակից: ՊԵԿ նախկին նախագահ Դավիթ Անանյանի զարմուհուն՝ կազմվերահսկողական վարչության աշխատակից Հասմիկ Մարգարյանին էլ կարող են նեղել։ Հնարավոր է՝ դա մասամբ պայմանավորված է Անանյանի գործոնով, ով նույնպես ընտրություններից առաջ արտահայտվեց եւ ասաց, որ ռեժիմը պետք է հեռանա։ Ի դեպ, նա եւ իշխանական թիրախում հայտնված որոշ այլ անձինք Դավիթ Անանյանի օրոք են աշխատանքի անցել համակարգում եւ հիմնականում պրոֆեսիոնալ մասնագետներ են, բայց քանի որ այլ քաղաքական հայացքներ ունեն, հնարավոր է՝ չաշխատեն։ Փաշինյանի կառավարության վերընտրությունից հետո եկել է դիլետանտների ու տգետների դարը, կարեւորը՝ լինեն ծառայամիտ եւ «քաղաքականապես չեզոք», այսինքն՝ իշխանամետ։

Մենք փորձեցինք այս թեմայով մեկնաբանություն ստանալ Պետեկամուտների կոմիտեից, ՊԵԿ լրատվականից բառացիորեն մեզ հետեւյալն ասացին․ «Ազատումները միշտ էլ եղել են, եւ ազատվում եմ սեփական դիմումի համաձայն»։ Ըստ էության, չհերքելով մեր տեղեկությունները, նաեւ չհաստատեցին։ Սակայն մենք կհետեւենք դեպքերի ընթացքին»։