Ագնեսա Խամոյանն ու Արծվիկ Մինասյանը պարտվեցին Գերասին ու Քրիստինե Վարդանյանին

ՀՅԴ 29-րդ արտահերթ Գերագույն ժողովի եզրափակիչ նիստում և «Առաջ» կուսակցության համագումարում հաստատվել է «Հայաստան» կուսակցությունների դաշինքի նախընտրական ցանկի առաջին երեք տասնյակը:

Ամենաուշագրավն այն է, որ հանրության մեծամասնությանն անհայտ «Առաջ» կուսակցությանը հաջողվել է նախընտրական ցուցակում առաջնային տեղեր ստանալ։ Մասնավորապես, հանրությանն ավելի շատ Սաքուլիկ անունով հայտնի Սեւակ Խաչատրյանը հանգրվանել է չորրորդ տեղում։

Մի հետաքրքիր դիտարկում եւս։ «Հայաստան» դաշիքում` իր քաղաքական ուժին բարձր վարկանիշ բերող Ագնեսա Խամոյանին տվել են միայն իններորդ տեղը, իսկ ահա հանրության մոտ «բացասական լիցքեր» առաջացնող, «Հայաստան» դաշինքից ձայներ խլող եւ վարկանիշ իջեցնող Քրիստինե Վարդանյանը վեցերորդն է։

Դժվար է ասել, թե ինչով է առաջնորդվել Ռոբերտ Քոչարյանը, որը համաձայնել է Գերասիմ Վարդանյանի` Գերասի նման սկանդալային կերպարին նվիրել ցուցակի 19-րդ տեղը, իսկ «սոլիդ եւ դրական» ընկալում ունեցող Արծվիկ Մինասյանին՝ միայն 29-րդ տեղը։

Տպավորություն է, որ Ռոբերտ Քոչարյանն ամեն ինչ արել է՝ հնարավորինս նվազեցնելու ակնկալվող ձայների քանակը։ Ի վերջո, դեռ չկողմնորոշված եւ տատանվող ընտրողը ցուցակի երկրորդ տեղում, տեսնելով Իշխան Սաղաթելյանին, հաստատ «Հայաստան» դաշինքին ձայն չի տա։ Իշխանը հաջողությամբ բացակայել է նիստերից, արել սկանդալային հայտարարություններ ու հիմա հարց` ինչո՞ւ է ուզում կրկին մանդատ ստանալ։  Այն, որ Ռոբերտ Քոչարյանը հաջող ցուցակ չի կազմել, վկայում է նաեւ այն փաստը, որ համաձայնել է այնտեղ ընդգրկել Բորիս Մուրազիին, որը մեկ այլ դաշինքում հայտնված ոմն մեկի անձնական ներկայացուցիչն է լինելու «Հայաստան» դաշինքում։  

«Հայաստան» դաշինքը խելամիտ եւ հավասարակշռված ցուցակ ներկայացնելու դեպքում կարող էր ակնկալել ընտրություններում ստանալ ընտրողների ձայների մոտ 15 տոկոսը, բայց այս ցուցակով պայքարը ընթանալու է խորհրդարանում հինգ-վեց մանդատ ստանալու համար։ 

Ամեն դեպքում, չնայած ակնհայտ սխալ որոշումներին, «Հայաստան» դաշինքի ցուցակը բազմակի անգամ ավելի հասկանալի է, քան այն ցուցակը, որը ներկայացրել են «ուժեղ տղաներն ու աղջիկները»։

«Հայաստան» դաշինքի պատգամավորի թեկնածուների անունների հաջորդականությունը հետեւյալն է՝

1. Ռոբերտ Քոչարյան
2. Իշխան Սաղաթելյան
3. Աննա Գրիգորյան
4. Սևակ Խաչատրյան
5. Արթուր Խաչատրյան
6. Քրիստինե Վարդանյան
7. Աղվան Վարդանյան
8. Գեղամ Մանուկյան
9. Ագնեսա Խամոյան
10. Լևոն Քոչարյան
11. Արթուր Սարգսյան
12. Լիլիթ Գալստյան
13. Մեսրոպ Մանուկյան
14. Գառնիկ Դանիելյան
15. Քրիստինե Նազարյան
16. Բորիս Թամոյան
17. Նարեկ Մանթաշյան
18. Լուսինե Քարամյան
19. Գերասիմ Վարդանյան
20. Կարեն Սիմոնյան
21. Անուշ Առաքելյան
22. Արման Ղազարյան
23. Արթուր Օհանյան
24. Արմենուհի Կյուրեղյան
25. Միհրդատ Մադաթյան
26. Իգոր Սարգսյան
27. Ռուբինա Պետրոսյան
28. Սամվել Հակոբյան
29. Արծվիկ Մինասյան
30. Անուշ Բրուտյան