«Սպառնալիքներով որևէ մեկը չի կարող մեզ վախեցնել, որպեսզի հրաժարվենք Աստծուն և ժողովրդին ծառայելուց». Տեր Վրթանես Բաղալյան

Նախընտրական քարոզարշավի ընթացքում հայ հոգևորականությանն ու գիտնականներին պիտակավորելը, սպառնալը կարծես թե ավանդույթ է դառնում իշխանության ներկայացուցիչների և Նիկոլ Փաշինյանի համար։ Հետևելով Նիկոլ Փաշինյանի օրինակին, այժմ էլ իշխանական պատգամավոր Վահագն Ալեքսանյանն է սպառնում հոգևորականությանը՝ հեռացնել եկեղեցուց։ Իսկ ավելի ստույգ՝ նա ոչ թե սպառնում է անմիջապես հեռացնել, այլ աստիճանաբար, հավանաբար իր մշակած քայլերի հաջորդականությամբ՝ նախ հայ հոգևորականության հետ բացատրական աշխատանք պետք է տարվի, եթե բացատրածը չհասկանան, դրանից հետո պետք է հեռացվեն եկեղեցուց, ֆեյսբուքյան իր էջում գրել էր իշխանության ներկայացուցիչ Ալեքսանյանը:

168.am-ի հետ զրույցում Օձունի և ենթաշրջանների հոգևոր հովիվ Տեր Վրթանես քահանա Բաղալյանն ասաց, որ իշխանության ներկայացուցիչների պահվածքի պատճառն այն է, որ այսօր կա ազգային եկեղեցի, և հայ հոգևորականները ծառայում են ոչ միայն Աստծուն, այլև ազգային հարցերի հետ կապված ունեն դիրքորոշում։

«44-օրյա պատերազմի ընթացքում եկեղեցին ակտիվ դերակատարություն ունեցավ, եկեղեցականներն անտարբեր չեղան, կանգնեցին բանակի, զինվորի, Արցախի մեր ժողովրդի կողքին։ Հավանաբար դրսի որոշ կառույցներ, որոնք հակահայկական են, նկատեցին եկեղեցու անձնվիրաբար ծառայությունն ազգին, ժողովրդին, նաև ազգային արժեքներին, սա պատճառ հանդիսացավ, որ հայ հոգևորականները թիրախավորվեն։ Հավանաբար մեր որոշ իշխանավորներ համագործակցում են դրսի ինչ-որ կառույցների հետ, որոնք իրենց ուղղորդում են եկեղեցու դեմ։ Վերջին արտահերթ ընտրությունների ժամանակ էլ եկեղեցին բավականին չեզոք էր, այդ պատգամավորը, որն անլուրջ հայտարարություն է անում եկեղեցականների հետ բացատրական աշխատանքներ տանելու մասին, կեղծ տեղեկատվություն է տարածում, թե եկեղեցականներն ուղղորդված էին, մեկ թեկնածուի էին պաշտպանում, և այլն։ Ներկայացնում է այնպիսի վիճակ, թե իբր եկեղեցականները խառնված են եղել ընտրություններին։ Եկեղեցին երբեք քաղաքական հարցերում, այդ թվում՝ ընտրություններին գերակտիվություն չի ցուցաբերել»,- նշեց տեր Վրթանես քահանա Բաղալյանը: 

Քահանայի խոսքով՝ եկեղեցականների մեջ կան մարդիկ, որոնք դեմ են ներկայիս իշխանությունների ապաշնորհ քաղաքականությանը և նրանց վերընտրվելուն։

«Ծառայելով Օձուն համայնքում, տեսա, թե ինչպես լռության օրն Օձունի իմքայլական շտաբն ամբողջ օրը եռուզեռի մեջ էր, չի փակվել, առավոտից երեկո աշխատում էին։ Եթե դա լիներ մեկ այլ ուժի շտաբ, իրենք հավանաբար կզանգեին ոստիկանություն, գործ կհարուցեին, պատասխանատվության կենթարկեին։ Բայց քանի որ իմքայլական շտաբն էր, անխափան կերպով աշխատում էր։ Այդ ընտրություններից հետո էլ տեսանք, որ նշանակովի որոշ պաշտոնյաներ՝ հանձին մարզպետների, ինչ վերաբերմունք ցուցաբերեցին ժողովրդի կողմից ընտրված համայնքապետերի նկատմամբ։ Այսինքն՝ այն բոլոր համայնքապետերը, որոնք իմքայլականների համար չեն աշխատել, նրանց հորդորել են հրաժարական ներկայացնել, օրինակ, Օձունի համայնքապետին, որն ընտրվել է ժողովրդի կողմից ու եղել է անկուսակցական։ Միայն ընտրվելուց հետո է դարձել կուսակցական՝ համայնքի շահերից ելնելով»,- ասաց Վրթանես քահանա Բաղալյանը։

Նա պատմեց, որ Լոռու մարզպետն Օձունի համայնքապետին կանչել է մարզպետարան, պահաջել է, որպեսզի հրաժարական տա, համայնքապետն էլ պատասխանել է, որ իրեն իր համայնքն է ընտրել, և հրաժարական չի տալու։

«Մարզպետի ընդունարանում մարզպետը, նրա օգնականներն ու տեղակալները ուղղակի հարձակվել են համայնքապետի վրա, հարվածել են, հայհոյել ու այս խուլիգանական կեցվածքով իշխանավորները, բնականաբար, նույնը կփորձեն անել նաև եկեղեցականների հանդեպ։ Եթե այս իշխանության ներկայացուցիչներին թվում է, որ դպրոցներից «Եկեղեցու պատմություն» հանելը եկեղեցականների դեմ է, սխալվում են՝ ժողովրդի դեմ է։ Երբ իշխանության է գալիս մի կառավարություն, որը դպրոցից ուզում է եկեղեցու պատմությունը հանել, հայ գրականության, հայոց լեզվի ու ռազմագիտության դասաժամերը կրճատել, թշնամու հետ խաղաղ ապրելու կոչեր է անում, պարզ է, որ այսպես կլիներ։ Այս իշխանության կառավարման ընթացքում նրանց միջնորդությամբ բազմաթիվ հարձակումներ են եղել եկեղեցականների վրա, եկեղեցու, այդ թվում՝ Վեհափառ հայրապետի նկատմամբ»,- հավելեց քահանան։

Նա ընդգծեց, որ իշխանության ներկայացուցիչները եկեղեցականների հետ բացատրական աշխատանքներ տանելու փոխարեն, լավ կլինի ծառայեն ազգին, պետությանը, քանի որ կարծես թե նրանք իշխանության են եկել քանդելու համար։ Այս ամենի արդյունքում էլ ժողովուրդը հուսահատված է, մեծ չափերի է հասել արտագաղթը, մարդիկ պատրաստվում են արտագաղթել ընտրություններից հետո, և այժմ իշխանությունը մտածում է, որ նույնին կարող է դրդել նաև եկեղեցականներին։

«Անկախ օրվա իշխանությունների կեցվածքից, մենք Աստծո և մեր ազգի կողքին ենք, դարեր շարունակ ծառայել ենք մեր ժողովրդին և պետք է շարունակենք ծառայել։ Ավելին՝ իշխանության ներկայացուցիչներն ուզում են, որ մենք իջնենք իրենց մակարդակին և իրենց համարժեք պատասխան տանք, որ դրանք տարբեր տեղերում դրոշակ դարձրած ցույց տան։ Նրանք մանիպուլյացիաներ անելու վարպետներ են, այդ առումով նրանք մրցակից չունեն, օրինակ, ներկայացնում էին մեկին ու ասում, թե հերոս Ռոբերտ Աբաջյանի պապիկն է։ Կամ վերջերս օձնեցիների անունից մեկը հանդես է գալիս, թե իբր վարչապետի տղային արդեն Բաքվին են հանձնում, խնդրում է, որ իրեն հանձնեն նրա փոխարեն, երբ այդ հայտարարություն անողը օձնեցի չէր, այլ Վանաձորից էր իրենց հետ եկել Օձուն։ Այսինքն՝ այսպիսի կեղծիքով իշխանության եկած անձինք, պարզ է, որ պետք է դեմ լինեն նաև ազգային եկեղեցուն։

Թող իրենք լավ իմանան, որ հայ հոգևորականներն իրենց քարկոծումից չեն վախենում, պատրաստ ենք Աստծու և մեր ժողովրդի համար գնալ անգամ նահատակության, և մեզ սպառնալիքներով որևէ մեկը չի կարող վախեցնել, որ մենք հրաժարվենք Աստծուն և ժողովրդին ծառայելուց»,- եզրափակեց տեր Վրթանես քահանա Բաղալյանը։