«Մթշաղի» աստղը դարձել է Warner Bros.-ի պրոդյուսեր

Բրիտանացի հայտնի դերասան Ռոբերտ Պատինսոնը պրոդյուսերական պայմանագիր է կնքել Warner Bros.-ի հետ՝ այդպես կոչված «առաջին ընտրության իրավունքի» գործարք։ Կինոընկերությունն իրավունք կստանա առաջինը դիտարկել Պատինսոնի նախագծերը, որոնցում նա հանդես կգա որպես պրոդյուսեր եւ գաղափարներ ընտրել արտադրության համար։ Գործարքը դարձել է Պատինսոնի առաջին խոշոր պրոդյուսերական պայմանագիրը։

«Warner Bros. Pictures-ը եւ HBO-ն մշտապես եղել են կինոարտադրության նորարարների հոմանիշ։ Ես շատ ուրախ եմ աշխատել նրանց հետ՝ ինձ համար բացահայտելու կինոյում եւ հեռուստատեսությունում ամենահետաքրքրաշարժ ձայները եւ օգնել նրանց տեսլականն իրականություն դարձնել։ Ինձ դուր է եկել երկար տարիներ աշխատել ստուդիայի հետ, եւ ես շատ եմ հարգում նրանց նվիրվածությունը գործին, ռիսկի դիմելու պատրաստականությունն ու գործին ստեղծագործական մոտեցում ցուցաբերելու ցանկությունը»,- դերասանի խոսքերը մեջբերել է Deadline-ը։

 Կնքված պայմանագիրը վերաբերում է միայն Պատինսոնի պրոդյուսերական գործունեությանը եւ չի առնչվում աստղի դերասանական կարիերային, այսինքն՝ նա կարող է նկարահանվել այլ կինոընկերությունների նախագծերում։