ԱՄՆ-ը մշտապես լկտիաբար խառնվում է այլ երկրների ներքին գործերին

Միացյալ Նահանգները լկտիաբար միջամտում են այլ երկրների ներքին գործերին՝ մարդու իրավունքների պաշտպանության պատրվակով: Այս մասին կիրակի օրը Ազգային ժողովրդական կոնգրեսի նստաշրջանի շրջանակներում կայացած ամենամյա մամուլի ասուլիսում ասել է Պետական ​​խորհրդի անդամ, Չինաստանի արտաքին գործերի նախարար Վան Ին:

«Երկար ժամանակ Միացյալ Նահանգները ժողովրդավարության եւ մարդու իրավունքների պաշտպանության պատրվակով անընդհատ լկտիաբար խառնվում են այլ երկրների ներքին գործերին: Դա աշխարհում ստեղծում է մեծ թվով խնդիրներ, իսկ որոշ դեպքերում տագնապ է առաջացնում: Անհրաժեշտ է, որ Միացյալ Նահանգները դա հնարավորինս հասկանա, այլապես աշխարհը հեռու կլինի կարգուկանոնից եւ հանգստությունից»,- ասել է նա:

Վան Ին նշել է, որ «որպես տարբեր համակարգեր ունեցող երկու երկրներ, Չինաստանը եւ ԱՄՆ-ն ունեն բնական տարաձայնություններ եւ տարակարծություններ»: Նա նաեւ նշել է, որ «անհրաժեշտ է այդ տարբերությունները եւ տարաձայնությունները լուծել հաղորդակցության միջոցով՝ խուսափելով բախումներից եւ առճակատումներից»:

Չինաստանը պատրաստ է երկխոսության ամերիկյան կողմի հետ եւ ակնկալում է, որ ԱՄՆ-ն կվերացնի երկկողմ համագործակցության անհիմն սահմանափակումները, ասել է Վան Ին: «Մենք բաց ենք ԱՄՆ-ի հետ համագործակցության խորացման հարցում: Հուսով ենք, որ ԱՄՆ-ը կշարժվի նույն ուղղությամբ եւ հնարավորինս շուտ կվերացնի երկկողմ համագործակցության բոլոր անհիմն սահմանափակումները եւ նոր խոչընդոտներ չեն ստեղծի»,- ասել է նա: