Թող իմքայլականները գնան Եռաբլուր, հետո հեռվից նայեն Շուշիին ու Հադրութին և ևս մեկ անգամ կրկնեն՝ արտահերթ ընտրությունների հանրային պահանջ չկա

«Այլընտրանքային նախագծեր» խմբի անդամ և «Ճշմարտություն սերունդների համար» նախաձեռնության համակարգող Գեղամ Նազարյանը Tert.am-ի հետ զրույցում անդրադարձել է արտահերթ խորհրդարանական ընտրությունների հետ կապված Նիկոլ Փաշինյանի առաջարկին՝ նշելով, որ Նիկոլ Փաշինյանը կհերքի իր այդ հայտարարությունը: «Երբ առաջիկա օրերին որևէ լրատվամիջոցի լրագրող մոտենա և հարցնի արտահերթ ընտրությունների մասին կամ արտահերթ ընտրություններից հրաժարվելու մասին, նա կբարկանա և կասի՝ գրավոր բերեք, թե ես ինչ եմ ասել, որից հետո «լայվ» է մտնելու և իր ստախոս ոճով հերքի իր այդ հայտարարությունը»,- ասաց Գեղամ Նազարյանը:

Գեղամ Նազարյանը շեշտեց՝ եթե հանրությունը հանդուրժում է նման ղեկավարի, ապա պետք է պատրաստ լինի ստախոսության: «Եթե հանրությունը, լրագրողները, քաղաքական գործիչները, բանակը, կոշկակարները հանդուրժում են երկրի ղեկավարի պաշտոնում մեկին և մինչև հիմա հանդուրժում են նրան, որը Արցախի կեսից շատը հանձնեց թշնամուն, 5000 երեխայի սպանեց անձամբ ինքը, բնականաբար ստելու է՝ ասելով՝ մի օր սա եմ ասել, մի օր նա, օրինակ՝ մի օր եկեք կանեփ աճեցնենք, մի օր կասի՝ եկեք արևածաղիկ աճեցնենք, տանենք ԱՄՆ-ի փողոցներում արևածաղիկ վաճառենք և այլն»,- ասաց նա:

Գեղամ Նազարյանի հավաստմամբ՝ իշխանությունները հրաժարվեց արտահերթ ընտրություններից, քանի որ հասկացան, որ չեն հաղթելու։ «Հիմա իրեն զեկուցեցին՝ դու ո՛չ ընտրություններում կհաղթես, ո՛չ մնալու ես իշխանության, և նա ամեն պահի ձգտում է մի ժամ ավել մնալ իշխանության գլխում։ Մի ժամ ավել մնալով՝ մեծ վնասներ է պատճառում այս երկրին»,- մեկնաբանեց Գեղամ Նազարյանը:

Նրա կարծիքով՝ արտահերթ ընտրությունների առաջարկը եղել է հանրությանը հանգստացնելու համար: «Մի քանի օր առաջ, երբ 50.000 մարդ ոտքի ելավ, ինքը այդ պայքարի ուժը նվազեցնելու համար, ասաց՝ կլինեն արտահերթ ընտրություններ՝ հույս ունենալով, որ այդ շարժումը կնվազի և կթուլանա, քաղաքական ուժերն էլ սկսեցին քննարկել այդ թեման և այլն: Նա երբեք չի գնա ընտրության, նա այս պահին վարկանիշ չունի, «ֆեյքերն» էլ չեն կարող մասնակցել ընտրության»,- ասաց նա։

Գեղամ Նազարյանը նաև անդրադարձավ թեզին, որ ըստ իշխանության՝ հանրային շրջանակներում արտահերթ ընտրությունների պահանջ չկա:

«Իմքայլականները նշում են՝ հանրությունը նման օրակարգ չունի, թող չոքեչոք գնան Եռաբլուր, գնան Գյումրիի, Վանաձորի, Իջևանի, Քանաքեռի գերեզմաններ, երեխեքի շիրիմների առաջ կանգնեն ու նայեն: Հետո հեռվից գնան Շուշին ու Հադրութին նայեն ու մեկ անգամ էլ կրկնեն, որ նման օրակարգ կա կամ չկա»,- ասաց Գեղամ Նազարյանը:

Փետրվարի 7-ին «Իմ քայլը» խմբակցությունը հայտարարություն էր տարածել, որում ասվում էր, որ Նիկոլ Փաշինյանը հանդիպել էր խմբակցության հետ, և արձանագրվել է, որ արտահերթ խորհրդարանական ընտրություններ անցկացնելու մասին վարչապետի առաջարկը դրական արձագանք չի ստացել խորհրդարանական ընդդիմության կողմից: Հայտարարությունում նաև ասվում էր, որ հանրության տարբեր շերտերում արտահերթ խորհրդարանական ընտրության պահանջարկ չկա: