Սերբիայի ՆԳ նախարարը հայտնել է երկրի նախագահի դեմ մաֆիայի հնարավոր մահափորձի մասին

Սերբիայի ՆԳ նախարար Ալեքսանդր Վուլինը ենթադրել է, որ խոշոր հանցավոր խմբավորման մոտ գտնված դիպուկահար հրացանը կարող էր նախատեսված լինել Սերբիայի նախագահ Ալեքսանդր Վուչիչի դեմ մահափորձի համար, փոխանցում է «ՌԻԱ Նովոստի»-ն:

Սերբիայի ոստիկանությունը եւ Անվտանգության ու տեղեկատվության գործակալությունը հինգշաբթի ձերբակալել էին խոշոր հանցավոր խմբավորման անդամների, որը, ենթադրաբար, համագործակցում է չեռնոգորյան մաֆիոզ կլանների հետ: Ցուցադրական խուզարկություններ են կատարվել նաեւ Բելգրադում «Պարտիզան» ֆուտբոլային ակումբի մարզադաշտում, որի երկրպագուների հետ են կապում խմբավորման պարագլուխներին: Ուրբաթ կասկածյալներին 22 ավտոմեքենայով ուժեղացված հսկողությամբ բերել են կազմակերպված հանցավորության դեմ պայքարի դատախազության բաժանմունք: Երկրի ՆԳ նախարարը շաբաթ հայտնել է, որ խմբի անդամների մոտ խուզարկությամբ հայտնաբերվել է դիպուկահար հրացան՝ խլացուցիչով եւ փամփուշտներով:

«Չգիտեմ՝ այդպես է, թե ոչ, քննությամբ կպարզվեն պատճառները, բայց միակ մարդը, ում մահը կկանգնեցներ մաֆիայի դեմ պայքարը, կարող էր լինել Ալեքսանդր Վուչիչը: Միակ մարդը, ում սպանությունը կաթվածահար կաներ ամբողջ պետությունը եւ կհանգեցներ ծանր քաղաքական անկայունության, հավանաբար, կկանգնեցներ պայքարը մաֆիայի դեմ, Ալեքսանդր Վուչիչն է»,- հայտարարել է երկրի ՆԳ նախարարը TV Prva-ի եթերում: