Գերմանիայից ԱՄՆ զորքերի դուրսբերման մասին վերջնական որոշումը ընդունվելու է 2021 թվականի կեսերից ոչ վաղ

Գերմանիայից ամերիկացի զինծառայողների դուրսբերման մասին վերջնական որոշումը ընդունվելու է 2021 թվականի կեսերից ոչ վաղ:

ԱՄՆ նախագահ Ջո Բայդենի հանձնարարությամբ հենց այդ ժամանակ պատրաստ կլինի ամբողջ աշխարհում ամերիկյան զորքերի ներկայության մասին զեկույցը, հայտնել է Միացյալ Նահանգների պաշտպանության նախարարության պաշտոնական ներկայացուցիչ Ջոն Քիրբին, փոխանցում է DW-ն:

Իսկ Պենտագոնի ղեկավար Լլոյդ Օսթինը Բայդենին առաջարկները կփոխանցի միայն զեկույցի պատրաստ լինելուց հետո, հավելել է Քիրբին:

Սպիտակ տան նախկին ղեկավար Դոնալդ Թրամփը 2020 թվականի հունիսին հաստատել էր Գերմանիայում ամերիկացի զինծառայողների թվաքանակը շուրջ 12 հազարով կրճատելու մտադրության մասին: Թրամփը զորքերի հնարավոր դուրսբերումը պատճառաբանել էր ՆԱՏՕ-ի առջեւ Գերմանիայի պարտքով: Այդ պահին Գերմանիայում տեղակայված էր Միացյալ Նահանգների մոտ 35 հազար զինվոր ու սպա:

Այդ ժամանակ պետության ղեկավարի պաշտոնը զբաղեցնող Թրամփի ծրագիրը հարուցել էր ինչպես Գերմանիայի Բունդեսթագում ներկայացված կուսակցությունների արտաքին քաղաքականության հարցերով փորձագետների, այնպես էլ Հյուսիսատլանտյան դաշինքի գլխավոր քարտուղար Յենս Ստոլտենբերգի քննադատությունը: Միաժամանակ Վաշինգտոնը կոնկրետ քայլեր չի ձեռնարկել Գերմանիայում ԱՄՆ զորակազմի կրճատման ուղղությամբ: