Երևան-Մոսկվա միակողմանի տոմսը որոշ ավիաընկերություններ երեկ դարձրին 1050 դոլար. Նաիրա Զոհրաբյան (տեսանյութ)

Այսօր Ազգային ժողովում «Բարգավաճ Հայաստան» խմբակցության պատգամավոր Նաիրա Զոհրաբյանն իր ելույթում անդրադարձավ հարցերին, որոնք, ըստ իրեն, պատերազմից հետո պետք է Ազգային ժողովում քննարկման առարկա դառնային և չեն դարձել: «Այս իշխանության համար ավելի կարևոր օրակարգ կա, թե ինչպես ավելացնել կալանքի սանկցիա տվող դատավորների թիվը, որովհետև բազմաթիվ պարկեշտ դատավորներ հրաժարվում են Նիկոլ Փաշինյանի «վնգստացող» դատավորները լինել և հրաժարվում են կատարել կեղտոտ քաղաքական պատվեր»,-ասաց նա և նշեց, որ իշխանությունն անընդհատ փորձում է կեղծ օրակարգեր բերել:

Նա նշեց, որ պետք է պատգամավորները նախօրեին գնային Զվարթնոց օդանավակայան և տեսնեին, թե ինչ է կատարվում: «Երևան-Մոսկվա միակողմանի տոմսը երեկ որոշ ավիաընկերություններ դարձրին 1050 դոլար: Մարդիկ գնում են, բա չե՞ք ուզում մեզ հետ միասին գնալ հարցնել՝ բա ինչո՞ւ են գնում, բա այդ մարդիկ 2018 թվականին մեծ հույսով քվեարկում էին ձեր օգտին»,-ասաց նա և տեղեկացրեց, որ Գագիկ Ծառուկյանը ևս զբաղվել է այդ խնդիրներով, հանդիպումներ, քննարկումներ ունեցել:

«Սա մեր ողբերգությունն է, որ այսօր մարդիկ տնով, տեղով ամբողջ գույքով լքում են հայրենիքը, և փոխանակ այնտեղ լինեինք և հասկանայինք, թե ինչ կարող ենք անել, որ հայը մնա հայրենիքում, մենք այստեղ քննարկում ենք՝ ինչպես ավելացնենք Նիկոլ Փաշինյանի համար «վնգստացող» դատավորերի թիվը»,-ասաց նա:

Նշենք, որ Ազգային ժողովը քննարկում է «Հայաստանի Հանրապետության դատական օրենսգիրք» սահմանադրական օրենքում փոփոխություններ և լրացումներ կատարելու մասին և կից ներկայացված օրենքների նախագծերի փաթեթը: Արդարադատության նախարար Ռուստամ Բադասյանը, ներկայացնելով նախագիծը, ասաց, որ նախագծի ընդունման հրատապությունը պայմանավորված է դատավորների թվաքանակի ավելացման և դրանով քրեական մասնագիտացման դատավորների ծանրաբեռնվածությունը թեթևացնելու, ինչպես նաև միջդատական քրեական վարույթի գործերի քննության արդյունավետությունը բարձրացնելու անհրաժեշտությամբ: