Ինչ պետք է անի եւ ինչ պետք է չանի Փաշինյանը
Գրեթե 24 ժամ անդադար Նիկոլ Փաշինյանը ֆեյսբուքյան գրառումներ է անում եւ ֆեյսբուքյան լայվի միջոցով իր խոհափիլիսոփայական մտքերը կիսում հայաստանցիների հետ: Կորոնավիրուսով հիվանդ վարչապետը իրավիճակից դուրս գալու ուղիներ փնտրելու փոխարեն անիմաստ ժամանակ է ծախսում, իրավիճակի համար բոլորին մեղադրելու համար:
Մեղավոր են թոշակի սպասող տատիկ-պապիկները, մեղավոր են բակերում խաղացող երեխաներն ու իրենց ծնողները, մեղավոր են բանկերի մոտ կանգնած վարկառուները, մեղավոր են հիվանդանոց գնացող եւ դռների տակ կանգնեցվողները, մեղավոր են բոլորը, բացի իրենից եւ կառավարության անդամներից:
Ճիշտ է, մի պահ նա ընդունեց, որ մեղավոր է նաեւ ինքը, բայց այնպես, ինչպես դա անում է ՀՀ յուրաքանչյուր քաղաքացի, զայրացած ժամանակ հայտարարելով, թե ինքն է մեղավոր, որ ընտրել է նման քաղաքական թիմ:
Նիկոլ Փաշինյանը պետք է հիշի, որ ինքը վարչապետ է, թիվ մեկ պաշտոնյան եւ ֆեյսբուքում անցկացրած ժամերի փոխարեն պետք է լուծումներ փնտրի, գտնի, խորհրդակցություններ անցկացնի, օգնություն խնդրի Ռուսաստանից, ԵՄ-ից, Չինաստանից, ԱՄՆ-ից:
Հայաստանում ապրում է մոտ երկու միլիոն մարդ, իսկ Վրաստանում՝ չորս, Չինաստանում մեկ միլիարդ չորս հարյուր միլիոն, Ռուսաստանում մոտ 145 միլիոն: Հայաստանոփւմ ապրում է երկու անգամ ավելի քիչ մարդ քան Վրաստանում, յոթանասուն անգամ քիչ քան Ռուսաստանում եւ յոթ հարյուր անգամ ավելի քիչ, քան Չինաստանում:
Հայաստանում մեկ օրում վարակվել է ավելի քան հինգ հարյուր մարդ, իսկ Վրաստանում՝ չորս: Ռուսաստանում այս թիվն այսօր կազմել է 8 536, իսկ Չինաստանում համավարակի ամբողջ ընթացքում վարակվել է 85 հազար մարդ:
Ինչ է սա նշանակում: Ընդամենն այն, որ Հայաստանի իշխանությունները տապալվել են: Սա նաեւ նշանակում է, որ նրանք հեռու են ոչ միայն կառավարումից, այլ հատկապես հակաճգնաժամային քայլեր անելուց: Եւ վերջապես, սպեցնազի մասին մտածող վարչապետը պետք է մի պահ սթափվի ու հասկանա, որ հեռանալու ժամանակն է:
Եթե վարչապետը մտածում է, որ կորոնավիրուսի դեմ պետք է պայքարի հատուկ ջոկատայինների օգնությամբ եւ ոչ թե գրագետ քայլերով եւ միջոցառումներով, ապա նրա հեռանալու ժամանակն է: Եթե չես կարողանում իրավիճակը փոխել, եթե ամեն ինչի համար մեղադրում ես բոլորին, բացի քեզնից, ապա ճիշտ ժամանակն է հավաքել իրերը եւ թողնել զբաղեցրած պաշտոնը:
Իրավիճակն ավելի սթափ գնահատելու համար ընդգծենք, որ եթե Չինաստանում լիներ հայաստանյան պատկերը, ապա այնտեղ վարակված կլիներ ոչ թե 85 հազար մարդ, այլ 60 միլիոն մարդ: Ի՞նչ կանեին Չինաստանի իշխանությունները, եթե նման պատկեր լիներ: Իհարկե, հրաժարական կտային:
Եթե Վրաստանում լիներ հայաստանյան պատկերը, ապա մեկ օրում վարակված կլիներ ոչ թե երկու կամ չորս հոգի, այլ հազար: Ի՞նչ կաներ վրաց ժողովուրդն այս իրավիճակում: Իհարկե՝ կպահանջեր կառավարության հրաժարականը:
Ի՞նչ կլիներ Ռուսաստանում, եթե մեկ օրում վարակվեր ոչ թե 8.5 հազար, այլ 600 հազար մարդ:
Հայաստանում սարսափելի ծանր իրավիճակ է եւ առաջին հերթին պայմանավորված կառավարիչների ապաշնորհությամբ: Երեկ ավտոբուսներից մեկում ուղեւորների մեջ ակտիվ քննարկում էր ընդանում, թե ինչ պետք է անել, որ դուրս գանք այս հիմար վիճակից, երբ մեկը հարցադրում արեց, իսկ ի՞նչ էին անելու այս իրավիճակում Քոչարյանն ու Սերժը: Հնչեց մի շատ դիպուկ պատասխան, եթե ղեկավարը լիներ Քոչարյանը մենք այս իրավիճակին չէինք հասնի եւ կունանայինք Վրաստանից ավելի բարվոք վիճակ: Բոլորը լռեցին:
Այնպես որ, Նիկոլ Փաշինյանը ֆեյսբուքյան գրառումներով եւ լայվերով մարդկանց մեղադրելու փոխարեն պետք է գոնե մեկ փորձ անի իրավիճակը շտկելու համար, իսկ հետո հրաժարական տա, եւ որքան շուտ, այնքան լավ բոլորի համար:
Հակոբ Ասատրյան
Top-News.am