Ադրբեջանի ԿԸՀ-ն ամփոփել է արտահերթ խորհրդարանական ընտրությունների արդյունքներն ու ուղարկել ՍԴ
Ադրբեջանի Կենտրոնական ընտրական հանձնաժողովը հրապարակել է Միլի մեջլիսի (խորհրդարանի)՝ փետրվարի 9-ին տեղի ունեցած ընտրությունների արդյունքները և արդյունքների արձանագրությունն ուղարկել Սահմանադրական դատարան՝ ուսումնասիրելու և հաստատելու համար: Այս մասին հայտնում է ТАСС-ը:
«Որոշում է կայացվել Միլի մեջլիսի ընտրությունների ընդհանուր արդյունքների մասին Կենտրոնական ընտրական հանձնաժողովի արձանագրությունը համապատասխան փաստաթղթերի հետ միասին հաստատման համար ուղարկել Ադրբեջանի Հանրապետության Սահմանադրական դատարան»,- ասվում է երկրի ԿԸՀ տարածած հաղորդագրությունում:
Նշվում է, որ ՍԴ-ն պետք է արդյունքներն ուսումնասիրի 10-օրյա ժամկետում և վերջնական որոշում կայացնի: Ադրբեջանում արտահերթ խորհրդարանական ընտրություններն անցկացվել են փետրվարի 9-ին: Համաձայն վերջնական արձանագրության՝ երկրի իշխող «Նոր Ադրբեջան» կուսակցությանը խորհրդարանում հասնող մանդատների թիվը ընտրությունների արդյունքում կազմել է 70 ընդհանուր 125-ից: Եվս 41 մանդատ ստացել են անկախ թեկնածուներ: Խորհրդարան կանցնի նաև Ադրբեջանի այլ կուսակցություններից առաջադրված 10 թեկնածու:
Նշենք, որ լուրջ ընտրախախտումների առկայության պատճառով Ադրբեջանի ԿԸՀ-ն անվավեր էր ճանաչել երկրի 4 ընտրական շրջանների քվեարկության արդյունքները: Ընդհանուր առմամբ անվավեր է ճանաչվել 328 ընտրատեղամասերի քվեարկության արդյունք: