«Իսլամիստական մտածելակերպ է, մնում է չադրա հագնեն». Քանդակագործը ստիպված է եղել դադարեցնել ցուցահանդեսը՝ «մերկ» քանդակների պատճառով
«Իսլամիստական մտածելակերպ է, մնում է չադրա հագնեն». Քանդակագործը ստիպված է եղել դադարեցնել ցուցահանդեսը՝ «մերկ» քանդակների պատճառով:
Քանդակագործ Սուրեն Մելքոնյանը ստիպված էր բացումից ժամեր անց փակել իր անհատական ցուցահանդեսը և «Նարեկացի» արվեստի միությունից տեղափոխել աշխատանքները: Պատճառը միության տնօրինության կողմից կիրառված սահմանափակումն էր՝ «գրաքննությունը»:
Ցուցահանդեսը «Նարեկացի» արվեստի միությունում բացվել էր փետրվարի 13-ին՝ «Շնչառություն կամ հետադարձ հայացք» խորագրով: Բայց հետագա ցուցադրությունը դադարեցվեց, քանի որ միության ղեկավարությունը քանդակագործին հորդորել էր ցուցադրությունից հանել մերկ և կիսամերկ քանդակներն ու նկարները: Սուրեն Մելքոնյանը հրաժարվել էր կատարել պահանջը՝ նախընտրելով փակել ցուցահանդեսը:
Քանդակագործը «Նարեկացի» արվեստի միության ղեկավարության այս սահմանափակումը «իսլամիստական մտածելակերպ» է որակում:
«Մնում է չադրա հագնեն: Մշակույթն ու արվեստը սահմաններ չեն սիրում: Դա նման է նրան, որ երաժշտությունից մի քանի տուն հանես, ասես՝ կրկներգով յոլա գնացեք: Եթե կտրում ես, աշխատանքի մեջ անկեղծությունը փչանում է»,- «Մեդիալաբին» ասում է Սուրեն Մելքոնյանը:
Միությունում նրան ասել են, որ իրենք կանոններն ունեն, ըստ որոնց՝ չի թույլատրվում մերկ նմուշների ցուցադրություն: Քանդակագործը հակադարձում է՝ արվեստը սահմանափակումներ չի սիրում:
«Ի՞նչ սահմանափակումների մասին է խոսքը, ինչպե՞ս կարող է արվեստը սահմանափակումներ ունենալ, սա աննախադեպ բան է»,- ասում է նա:
«Նարեկացի» արվեստի միության գեղարվեստական ղեկավար Լուսինե Ազարյանը, սակայն, այս ամենին բավականին ուշագրավ բացատրություն է տալիս: Ըստ նրա՝ կիրառված սահմանափակումները կապված են ոչ թե սահմաններ չճանաչող արվեստը չընդունելու, այլ երեխաների հետ:
«Մեզ մոտ մանկական խմբակ կա, և հիմնադիրներն առհասարակ խնդրել են, որ նման ցուցադրություններ չլինեն, քանի որ երեխաները շատ են գնում-գալիս: Նաև մանկական նվագախումբ ունենք, որը նույն տարածքում է: Քանի որ իրենք փոքրիկ են, մենք չենք կարող հետևել այդ ամենին, դա ներկայացնել որպես արվեստի նմուշ, գեղեցկությունը ցույց տալ: Այդ պատճառով հիմնադիրներն առաջարկում են, որ փորձենք ուղղակի բալիկների համար այդ մասը սահմանափակել»,- «Մեդիալաբին» ասում է Լուսինե Ազարյանը:
Հարցին, թե արդյոք տարօրինակ ու հետամնաց չէ՞ արվեստի կենտրոնի կողմից նման դիրքորոշում որդեգրելը, Ազարյանը պատասխանում է.
«Բացարձակ ոչ: Եթե ես կարողանամ ամեն բալիկի հետ անցկացնել էքսկուրսիա, ունենալ թեմատիկ զրույց, թե ինչքան գեղեցիկ է մարդկային մարմինը, բացատրել այդ ամենը արվեստի տեսանկյունից, ես վստահ չեմ, որ ամեն մի ընտանիքում դա կընկալվի որպես սիրուն պրոպագանդա: Եթե ես գործ ունենամ մեծերի հետ, դա նորմալ է, իսկ եթե փոքրիկների հետ գործ ունեմ, իրենց ծնողները կարող են մեզ չհասկանալ»:
Այսինքն, նույն տրամաբանությամբ՝ երեխաներին չպե՞տք է տանել թանգարան։ Այս հարցին էլ միության գեղարվեստական ղեկավարը պատասխան ունի. պետք է տանել, բայց «պետք է տանել պատրաստված, մասնագետի հետ»:
Քանդակագործ Սուրեն Մելքոնյանի կինը՝ նկարիչ, քանդակագործ Լիլի Կարապետյանը, սակայն, պնդում է, որ սահմանափակումները միայն մանուկներով պայմանավորելն արդարացի չէ: Նա նշում է, որ որպես արվեստագետ ինքը ևս վերջերս բախվել է «Նարեկացի» արվեստի միության սահմանափակումներին, սակայն տեղի չի տվել:
Հայաստանի նկարիչների միությունում «Շիտակ սարերի ծուռ կերպարներ» խորագրով կերամիկական դիմակների ցուցահանդեսից հետո Կարապետյանը «Նարեկացի» արվեստի միության տնօրինության հրավերով որոշել է իր աշխատանքները ցուցադրել նաեւ կենտրոնում:
«Երբ արդեն մոտեցան ցուցահանդեսի օրերը, եւ պետք է դիմակները տանեի, տնօրենն ասաց՝ գիտես, չէ՞՝ պետք է քաղաքական թեմա չլինի: Ես ասացի, որ ընդհանուր նախագիծն է քաղաքական, որովհետև դիմակներում ներառված էին և «Սասնա ծռերը», և քառօրյա պատերազմի հերոսները, և Վարդան Մամիկոնյանը, այսինքն՝ Հայկ նահապետից մինչև մերօրյա հերոսները: Ասացին, որ մերօրյա հերոսներին չընդգրկեմ»,- «Մեդիալաբին» պատմում է Լիլի Կարապետյանը:
Նա նշում է, որ առանձնապես ուշադրության են արժանացել նախագծում ներառված կավե դիմակներից երկուսը՝ Պավել Մանուկյանինը՝ որպես 90-ականների արցախյան պատերազմի հերոս, և Ալեք Ենիգոմշյանինը՝ որպես «Ասալայի» անդամ:
«Ինձ զանգեցին և ասացին՝ բա չէինք խնդրե՞լ, որ մերօրյա հերոսներին չընդգրկես: Ես հարցրեցի, թե ում նկատի ունեն, պատասխանեցին՝ Պավել Մանուկյանին ու Ալեք Ենիգոմշյանին: Հետո էլ առաջարկեցին՝ իսկ եթե այդ երկու դիմակը հանե՞նք: Ես ասացի, որ սկզբունքային արվեստագետ եմ, եթե իմ նախագծից պետք է ինչ-որ մեկին հանեմ, ես ընդհանուր ցուցահանդեսը չեղյալ կհայտարարեմ»,- «Մեդիալաբին» պատմում է Կարապետյանը:
Ըստ նրա՝ իր հաստատակամության արդյունքում միության ղեկավարությունը որոշել է թույլատրել ցուցադրությունը՝ պայմանով, որ «քաղաքական ելույթներ ու ճառեր չպետք է հնչեն ցուցադրության ընթացքում»:
«Նարեկացի» միության գեղարվեստական ղեկավար Լուսինե Ազարյանը պարզաբանում է՝ միության սկզբունքի համաձայն՝ արվեստը չպետք է խառնել քաղաքականության հետ:
«Որպեսզի հանգիստ ու խաղաղ զբաղվենք մեր գործով, միությունն ունի որոշակի սահմանափակումներ, ինչը կապված չէ ո՛չ քաղաքական դիրքորոշման, ո՛չ չընկալման կամ հատուկ դիրքորոշման հետ: Ես հասկանում եմ՝ ամեն մարդ իրավունք ունի դրա վերաբերյալ իր դիրքորոշումն ունենալ: Սա պետական հիմնարկ չէ, մեր նպատակը մեր ազգային մշակույթին նպաստելն է: Մենք ուղղակի չենք ուզում հավելյալ քաղաքական հարցերի պատասխանել: Նորմալ է սահմանափակումը, եթե սա մեր սեփական տունն է, որովհետև ամեն մարդ իրավունք ունի իր դիրքորոշումն ունենալ: Մենք չենք խառնում արվեստը քաղաքականության հետ»,- ասում է նա:
Լիլի Կարապետյանն ասում է, որ այս սահմանափակումներն իրենց համար՝ որպես արվեստագետ, խորթ են: Տեղի ունեցածը նա խտրականության դրսևորում է համարում:
«Քաղաքականի մասին եթե չխոսենք էլ, կարելի՞ է, արդյոք, ընկալել արգելքները, երբ հարցը հասնում է վերածննդի ոգով արված աշխատանքներին, ինչպիսին Սուրեն Մելքոնյանի աշխատանքներն են: Ստացվում է, որ ամբողջ վերածննդի դարաշրջանը ցեխոտում են՝ ասելով, թե ամոթ է, մերկ մարմիններ են,- ասում է Կարապետյանը։ Նա նշում է, որ կենտրոնը, որպես այդպիսին, իրենց համար արդեն գոյություն չունի.
«Որպես արվեստագետ՝ դեմ եմ այդ հաստատությունը արվեստի միություն կոչելուն: Ողբալի է, որ Հայաստանում սահմանափակումների օղակը հասել է նաև արվեստի պարանոցին»:
Ռոզա Հովհաննիսյան
Մոսկվայում հրդեհել են Սամվել Կարապետյանին պատկանող առեւտրի կենտրոնը (Տեսանյութ)
Կարեն Կարապետյան. «Ես վստահ եմ, որ ամեն ինչ լավ կլինի»
Հավանաբար ԱԱԾ աշխատողները գտել իշխանությանը լոյալ քահանաների, իրենց են դիմել, ինձ չեն դիմել. Տեր Նշա...
Տարոն Մարգարյանը կգործուղվի Մոսկվա
44-օրյա պատերազմը սկսվել է երկու պատճառով․ Հայաստանի խորհրդարանի փոխնախագահ
Բագրատ Սրբազանի խափանման միջոցը փոխելու միջնորդություն է ներկայացվել
Պոլսո Հայոց Պատրիարքը չի հստակեցնում՝ դե՞մ է Կաթողիկոսի հեռացման պահանջին, թե ոչ
Սի Ծինփինը ներկայացրել է Չինաստանի դիրքորոշումը Ուկրաինայի հակամարտության խաղաղ կարգավորման վերաբերյ...
Զախարովան Կալլասին և Կոսին համեմատել է վամպիրների հետ՝ Երևանի հետ հարաբերությունների մասին հայտարարո...
«Ձեր ուսանողը չեմ, որ ինձ հարցեր տաք», «Պարտավոր եք դրսևորել պատշաճ վարքագիծ, ավել բան մի՛ ասեք»
Այո’, թող Արթիկի ՔԿՀ պետի տեղակալը և ընտանիքը հետևություն անեն. Գալյանը՝ Զորական գյուղում պատանու ծե...
Հայտարարություն․ տարածքի անվտանգությամբ պայմանավորված՝ բեռնատարների մուտքը սահմանափակվում է