«Այն բոլոր մարդիկ, որոնք ունեն փորձ, գիտելիք, իհարկե, պետք է ամեն ձևով օգտակար լինեն». Դավիթ Բաբայան

Հայաստանյան տասնյակից ավելի կուսակցություններ հայտարարություն են տարածել՝ հրատապ կարգով «Ռազմաքաղաքական հարցերի օպերատիվ կառավարման շտաբ» ստեղծելու անհրաժեշտության վերաբերյալ։

Հայ Հեղափոխական Դաշնակցության ԳՄ ներկայացուցիչ Իշխան Սաղաթելյանը ներկայացնելով հայտարարությունը՝ հատուկ ընդգծեց, որ ՀՀ քաղաքական դաշտի կուսակցություններն անցնող օրերի ընթացքում, այսինքն՝ պատերազմը հայտարարելուց հետո, ցուցաբերել են բացառիկ համերաշխություն և միասնականություն:

«Սեպտեմբերի 27-ին՝ պատերազմը հայտարարելուց ժամեր անց, Հայաստանի քաղաքական դաշտի շուրջ 14 քաղաքական ուժեր, մի կողմ դնելով բոլոր քաղաքական տարաձայնությունները, ընդգծեցին, որ բոլորս կանգնում ենք Հայոց բանակի կողքին, հայոց երկու պետությունների կողքին, և իրենց բոլոր ուժերն ու հնարավորությունները ներդնելու են, որպեսզի միասնաբար կասեցնեն ագրեսոր թշնամու գործողությունները և միասնաբար հասնեն հաղթանակի»,- ասաց Իշխան Սաղաթելյանը»:

168.am–ը Արցախի Հանրապետության նախագահի արտաքին հարաբերությունների հարցերով խորհրդական Դավիթ Բաբայանից հետաքրքրվեց, թե Արցախում ի՞նչ կարծիք ունեն 13 կուսակցությունների առաջարկի մասին, և այս պահին այն որքանո՞վ կարող է օգտակար լինել։

«Այս պահին ներքաղաքական ընդհանուր հարցերի վերաբերյալ չեմ խոսի, սակայն մեկ բան կասեմ, որ այն բոլոր մարդիկ, որոնք ունեն փորձ, գիտելիք, իհարկե, պետք է ամեն ձևով օգտակար լինեն։ Թե ինչ ձևով դա պետք է լինի, արդեն պետք է որոշվի տեղում։ Կրկնում եմ՝ այն մարդիկ, որոնք ունեն համապատասխան փորձ, գիտելիք՝ լինի նախկին ղեկավար թե զինվորական, կարծում եմ՝ պահն այնպիսին է, որ նրանց ներուժը պետք է օգտագործվի: Այսքանը»,- եզրափակեց Դավիթ Բաբայանը։