ԲՀԿ ավագանու անդամին ու երիտթևի նախագահին բերման են ենթարկել ու տարել Էջմիածին

Այսօր կեսօրից քիչ անց Ազգային ժողովի շենքի դիմացից բերման ենթարկեցին Երևանի ավագանու ԲՀԿ խմբակցության անդամ Արմեն Ներսիսյանին և երիտթևի նախագահ Աշոտ Անդրեասյանին։ Երկուսին էլ տարել են ոստիկանության Էջմիածնի բաժին, 168.am-ին հայտնեց Երևանի ավագանու ԲՀԿ խմբակցության ղեկավար Միքայել Մանրիկյանը։

Հիշեցնենք՝ ԱԺ շենքի դիմաց հավաքվել էին ԲՀԿ առաջնորդ Գագիկ Ծառուկյանի մի խումբ աջակիցներ, որոնցից մի քանիսին՝ մոտ 2 տասնյակ մարդու, ոստիկանությունը բերման ենթարկեց:

Տեղեկացնենք նաև, որ ժամը 11:00-ի դրությամբ Ազգային ժողովի դիմացից բերման է ենթարկվել 103 անձ: Տեղեկությունը 168.am-ին հայտնել էին ՀՀ Ոստիկանությունից: Բերման ենթարկվածները տարվել են ոստիկանության տարբեր բաժիններ:

Մարդու իրավունքների պաշտպանի հանձնարարությամբ՝ արագ արձագանքման խմբեր են մեկնել ՀՀ ոստիկանության բաժիններ անձանց բերման ենթարկելու առնչությամբ։

Ինչպես ֆեյսբուքյան էջում տեղեկացրել է ՀՀ մարդու իրավունքների պաշտպանը, տեղի կունենան առանձնազրույցներ բերման ենթարկված քաղաքացիների հետ, կուսումնասիրվեն նրանց բերման ենթարկելու հիմքերն ու իրավունքների ապահովման վիճակը, ինչպես նաև այդ առնչությամբ Ոստիկանությունում կազմված փաստաթղթերը։