Մոտ 3 մլն դրամ՝ Տյառնընդառաջին տրվող ոսկյա կախազարդերի համար. Եղվարդի համայնքապետարանի գնումները

Եղվարդի համայնքապետարանի 2020թ. գնումների պլանում տեղ են գտել տվյալներ ծաղիկների, ըմպելիքների, տոնական մոմերի և կախազարդերի գնումների վերաբերյալ:

Մասնավորապես, ըստ գնումների պլանի՝ համայնքապետարանը գրեթե 3 մլն դրամ է նախատեսել 110 ոսկյա կախազարդ գնելու համար, 120 զարդատուփի համար էլ հատկացվում է 18 000 դրամ:

Համայնքապետարանը 300 վարդ գնելու նպատակով կտրամադրի 240 000 դրամ, 90 000 դրամ՝ 300 մեխակի և մոտ 63 000 դրամ՝ 130 տոնական մոմերի համար:

Ներկայացուցչական ծախսերի նպատակով էլ 45 000 դրամ կծախսվի 100 գազավորված հյութի, 35 000 դրամ՝ 50 բնական հյութի և 32,500 դրամ՝ 5 կոնյակի համար:

Tert.am-ի հետ զրույցում Եղվարդի համայնքի ղեկավարի խորհրդական Վահագն Վիրաբյանը պարզաբանեց, որ կախազարդերը, տոնական մոմերն ու զարդատուփերը նախատեսված են Տյառնընդառաջի միջոցառումների համար:

«Ամեն տարի եկեղեցու բակում Տյառնընդառաջի հետ կապված միջոցառումներ են կազմակերպվում, և զույգերից յուրաքանչյուրին մեկ կախազարդ, մեկ տոնական մոմ և մեկ զարդատուփ է տրվում»,- ասաց Վիրաբյանը: