Պարզվում են համավարակի պայմաններում տնտեսվարողների գործունեությունը վերսկսելու հնարավորությունները

Հայաստանի արդյունաբերողների և գործարարների միությունն ուսումնասիրություն է նախաձեռնել ամենատարբեր ոլորտները ներկայացնող իր անդամների շրջանում՝ տնտեսվարողների մոտ թագավարակի պանդեմիայով պայմանավորված իրավիճակը և գործունեությունը վերսկսելու հնարավորությունները պարզելու համար։

Բաժանված հարցաշարում ներառված են բազմաթիվ արդիական հարցեր, որոնք մասնավորապես վերաբերվում են գործունեության վայրում իրականացվող անվտանգության և հակավարակային գործընթացներին, ընկերությունների կրած տնտեսական դժվարություններին, ստեղծված իրավիճակում տնտեսվարման նորամուծություններին, աշխատատեղերի պահպանման հնարավորություններին։ Հարցման մասնակիցներն իրենց տեսակետները կհայտնեն նաև այն կարևոր նպատակների առնչությամբ, որոնց ներկայումս պետք է հետամուտ լինի գործադիր իշխանությունը, այդ ուղղությամբ ակնկալվող քայլերը, գործարարների առաջնահերթ անելիքները և այլն։

Հայաստանի արդյունաբերողների և գործարարների միության նախագահ Արսեն Ղազարյանը ՀԱԳՄ նախագահության անդամներին ուսումնասիրության նպատակները ներկայացնելիս նշեց, որ հարցման արդյունքների ամփոփումից հետո հնարավոր կլինի առավել հանգամանալի պատկեր և մանրամասն տեղեկություններ ստանալ՝ հետագա վերլուծությունների, առաջարկների և քայլերի համար։