Վարչապետը սիրում է չէ՞ ասել՝ ամեն բան ձեր գլխում հաղթահարեք, եկեք մեր գլխում հաղթահարենք, քանի որ անկախ պետություն ենք. Գևորգ Պետրոսյան

 ԱԺ պետական իրավական մշտական հանձնաժողովում քննարկվում է «Բարգավաճ Հայաստան» խմբակցության պատգամավոր Գևորգ Պետրոսյանի նախագիծը, որով պատգամավորն առաջարկում է սահմանադրական կարգի տապալման պատասխանատվության համար վաղեմության ժամկետ չկիրառել:

Արդարադատության նախարարի տեղակալ Սրբուհի Գալյանը պատգամավորից հետաքրքրվեց, արդյո՞ք ճիշտ է հասկանում, որ Պետրոսյանի համար հանրային վտանգավորության տեսնակյունից սահմանադրական կարգի տապալումն ավելի վտանգավոր հանցագործություն է, քան պետական դավաճանությունը կամ լրտեսությունը:

Ի պատասխան՝ պատգամավորն ասաց, որ պետական դավաճանության բերած վնասը կարող է միանգամից երևալ, ակնհայտ լինել, իսկ սահմանադրական կարգի տապալման բերած վնասը կարող է այդպես արագ չբացահայտվել, ակնհայտ չլինել:

«Բայց ասեմ, որ այդքան շատ մեծ տարբերություն չեմ տեսնում, որովհետև մարդը կարող է պետական դավաճանություն թույլ տալ՝ ելնելով զուտ իր անձնական խնդիրները լուծելուց, և ըստ էության, հետևանք վրա չհասնի, որովհետև դա ձևական հանցակազմ է, նյութական չէ, իսկ սահմանադրական կարգի տապալումը, թեկուզ ոչ տվյալ օրը, բայց մոտ ապագայում կարող է շատ լուրջ վտանգներ ստեղծել, թե՛ ներքին, թե՛ արտաքին անվտանգության համար»,- ասաց Գևորգ Պետրոսյանը:

Փոխնախարարն էլ հետաքրքրվեց՝ արդյո՞ք պատգամավորն ուսումնասիրել է արտասահմանյան երկրների փորձը և գտել է գոնե մեկ երկիր, որի օրենսդրական կարգավորումները թույլ են տալիս ասելու, որ սահմանդրական կարգի դեմ ուղղված իքս հանցագործության դեպքում կամ հենց սահմանադրական կարգը տապալելու դեպքում վաղեմության ժամկետները չպետք է կիրառվեն:

Պետրոսյանն ասաց, որ որևէ երկրի փորձ չի ուսումնասիրել: Նա նշեց, որ պարտականություն չունեն՝ կոնկրետ այսպիսի նախաձեռնութունների դեպքում անպայման գտնել՝ ինչ-որ երկրում կա նման բան, թե՝ ոչ:

«Վերջապես, մեր վարչապետը սիրում է չէ՞ ասել՝ այդ խնդիրները սկզբում մեր գլխում պետք է հաղթահարենք: Ժողովուրդ, եկեք մեր գլխում հաղթահարենք, որ անկախ պետություն ենք ու պարտադիր չէ, որ ներպետական օրենսդրությունը, որի նպատակը ներքին և արտաքին անվտանգության պաշտպանությունն է, տեսնենք՝ Մոզամբիկում նման բան կա, թե չէ: Մեր արտաքին մարտահրավերները շատ մեծ են, իմ ինչի՞ն է պետք, թե հարավաֆրիկյան կամ թեկուզ եվրոպական երկրում կա նման բան, թե ոչ»,- ասաց նա:

Պատգամավորը հավելեց. «Եթե ես ասեի՝ եկեք վերականգնենք հարսնացուի համար ղալիմ տալը, նման հոդված կար նախկին Քրեական օրենսգրքում, այո՛, կարող էիք ասել՝ ա՛յ ընկեր ջան, 20-րդ դարում ես ապրում, ուսումնասիրե՞լ ես՝ եվրոպական երկրում ղալիմ տալը մնացել է, որ նման առաջարկ ես անում: Բայց ես այնպիսի բան եմ առաջարկում, որ կարիք էլ չկա, անպայման ընկնենք, մի հատ երկրի օրինակ վերցնենք ու ասենք՝ այս երկրում կա, մենք կարող ենք վերցնել»: