Իտալիան մինչև տարվա վերջ չի բացի սահմանները զբոսաշրջիկների համար

Իտալիան մինչև տարվա վերջ չի բացի սահմանները զբոսաշրջիկների համար: Այս մասին La Repubblica պարբերականին տված հարցազրույցում հայտարարել է Իտալիայի մշակույթի և տուրիզմի նախարար Դարիո Ֆրանչեսկինին:

«Սահմանների բացումը կախված կլինի համաճարակային իրավիճակից և առանձին պետությունների քաղաքականությունից»,-ավելացրել է պաշտոնյան:

Միևնույն ժամանակ Ֆրանչեսկինին ենթադրել է, որ մայիսին Իտալիայում կվերսկսվեն թանգարանների և տեարժան վայրերի աշխատանքները, որոնք փակվել էին կորոնավիրուսի համաճարակի պատճառով:

Աշխատանքները վերսկսող տեսարժան վայրերից մեկն էլ Կոլիզեյը կլինի:

Իտալիայում վերջին տվյալներով գրանցվել է կորոնավիրուսով վարակման 195 351 դեպք, վարակման հետևանքով երկրում մահացել է 26 384 մարդ:

Նոր տեսակի կորոնավիրուսով վարակվածների թիվն ամբողջ աշխարհում 2 921 571 է, մահացել է 203 299 մարդ: Առողջապահության համաշխարհային կազմակերպությունը կորոնավիրուսի համավարակ է հայտարարել մարտի 11-ին: Վիրուսը տարածվել է 210 երկրում: Համաճարակի բռնկման մասին Չինաստանի իշխանություններն ԱՀԿ-ին հայտնել են դեկտեմբերի 31-ին: