Թրամփը բացատրություն է պահանջել կորոնավիրուսի երկրորդ բռնկման մասին հայտարարության կապակցությամբ

ԱՄՆ նախագահ Դոնալդ Թրամփը Սպիտակ տանը կայացած ճեպազրույցին բեմ է հրավիրել Հիվանդությունների վերահսկման եւ կանխարգելման կենտրոնների ղեկավար Ռոբերտ Ռեդֆիլդին եւ պահանջել է բացատրություններ տալ կորոնավիրուսի բռնկման երկրորդ ալիքի մասին հայտարարության կապակցությամբ:

Իր հերթին, Ռեդֆիլդը հայտարարել է, որ պարբերականները սխալ են մեկնաբանել իր խոսքերը: «Ես չեմ ասել, որ ավելի վատ է լինելու. ես ասել եմ, որ ավելի բարդ է լինելու»,- Washington Post-ին ասած իր խոսքերը բացատրել է Ռեդֆիլդը: «Խնդիրը, որի մասին ես խոսում էի, ենթադրում էր, որ ավելի դժվար կլինի այն տեսանկյունից, որ մեզ մոտ միաժամանակ երկու վիրուս է տարածվլեւո»,- պարզաբանել է Ռեդֆիլդը: Ըստ Հիվանդությունների վերահսկման եւ կանխարգելման կենտրոնների ղեկավարի` նա ցանկանում էր ամերիկացիներին օգնել նվազագույնի հասցնել գրիպով վարակվելու վտանգը COVID-19-ի երկրորդ ալիքի դեպքում:

Թրամփը կտրականապես առարկել է Ռեդֆիլդին` հայտարարելով, որ կորոնավիրուսի աշնանային ալիքի դեպքում հիվանդությունն այն վարակունակությունը չի ունենա, ինչ այս գարնանն է: