Նիկոլ Աղբալյանի անվան համար 19 հիմնական դպրոցի տնօրենի մրցույթի արդյունքները չեղյալ են ճանաչվել

2020 թվականի մարտի 6-ին տեղի է ունեցել «Երեւանի Նիկոլ Աղբալյանի անվան համար 19 հիմնական դպրոց» պետական ոչ առեւտրային կազմակերպության տնօրենի թափուր տեղի համար հայտարարված մրցույթը: Տնօրեն էր ընտրվել դպրոցի նախկին տնօրեն Լիանա Աշրաֆյանը։

Նշենք, որ դպրոցի տնօրենի թափուր հաստիքի թեկնածուներն էին Լիանա Աշրաֆյանը, Անժելա Կարապետյանը, Տաթեւիկ Մարաբյանը, Անուշ Մարտիրոսյանը, Արմինե Մարտիրոսյանը։

Կառավարման խորհուրդի 6 անդամներից 1-ը քվեարկել է Անուշ Մարտիրոսյանի, 5-ը՝ Լիանա Աշրաֆյանի օգտին։

Երեւանի քաղաքապետ Հայկ Մարությանի ապրիլի 16-ի որոշմամբ մրցույթի արդյունքները չեղյալ են ճանաչվել։

ՀՀ կրթության, գիտության, մշակույթի եւ սպորտի նախարարը 02.04.2020թ. հ.01/07.1/7798-20 գրությամբ դիմել է Երեւանի քաղաքապետարան՝ ՀՀ կրթության, գիտության, մշակույթի եւ սպորտի նախարարի 2020 թվականի մարտի 24-ի N 235-Ա հրամանով ձեւավորված հանձնաժողովի 27.03.2020թ. եզրակացության հիման վրա «Երեւանի Նիկոլ Աղբալյանի անվան համար 19 հիմնական դպրոց» պետական ոչ առեւտրային կազմակերպության տնօրենի թափուր տեղի համար 2020 թվականի մարտի 6-ին կայացած մրցույթի արդյունքները չեղյալ ճանաչելու առաջարկությամբ:

Եզրակացության մեջ, մասնավորապես, ասվում է.

«Ուսումնասիրությամբ պարզվեց նաեւ, որ 2020 թվականի հունվարի 23-ին «Հայաստանի Հանրապետություն» թերթում հրապարակվել է դպրոցի տնօրենի պաշտոնի թափուր տեղի համար մրցույթ հայտարարելու մասին 1-ին հրապարակումը, իսկ 2-րդը նույն թերթում պետք է լիներ հունվարի 28-ին, սակայն ՀՀ կառավարության 2020 թվականի հունվարի 23-ի «Աշխատանքային օրը տեղափոխելու մասին» հ.42-Ն որոշման 1-ին կետի համաձայն՝ 2020 թվականի հունվարի 27-ի աշխատանքային օրը տեղափոխվել է 2020 թվականի փետրվարի 1-ը՝ շաբաթ օրը, ինչի արդյունքում անհնարին է դարձել հունվարի 28-ին 2-րդ հրապարակումն այդ թերթում եւ այն հրապարակվել է հունվարի 29-ին՝ «Հայկական ժամանակ» օրաթերթում, իսկ «Հայաստանի Հանրապետություն» թերթում՝ հունվարի 30-ին:

«Նորմատիվ իրավական ակտերի մասին» օրենքի 31-րդ հոդվածի 8-րդ մասի համաձայն՝ եթե ժամկետի ավարտը պայմանավորված է վրա հասած իրադարձությամբ, ապա այն ավարտված է համարվում վրա հասած իրադարձության օրվան հաջորդող օրվանից, որով որոշված է ժամկետի ավարտը, իսկ 32-րդ հոդվածի 4-րդ մասի համաձայն՝ եթե ժամկետի վերջին օրը ոչ աշխատանքային օր է, ապա ժամկետի ավարտի օր է համարվում դրան հաջորդող աշխատանքային օրը:

Սակայն չի պահպանվել Կարգի 7-րդ կետի հետեւյալ պահանջը՝ «մրցույթին մասնակցելու մասին հայտերն ընդունվում են հայտարարության երկրորդ հրապարակման օրվանից 30 օրվա ընթացքում»: Այսինքն՝ հիմք ընդունելով, որ «Նորմատիվ իրավական ակտերի մասին» օրենքի 31-րդ հոդվածի 7-րդ մասի համաձայն՝ օրերով հաշվարկվող ժամկետը լրանում է այդ ժամկետի վերջին օրը, ապա հայտարարության երկրորդ հրապարակման օրվանից (29.01.2020թ.) հաշված հայտերի ընդունման 30-րդ օրը փետրվարի 27-ն է եւ ոչ թե հայտարարության մեջ նշված փետրվարի 26-ը: Հետեւաբար՝ պետք է տեղափոխվեր նաեւ մրցույթի անցկացման օրը եւ կարգի 7-րդ կետի համաձայն՝ նշանակվեր փաստաթղթերի ընդունման ավարտից հետո յոթերորդ աշխատանքային օրը, որը չի կատարվել եւ դրանով իսկ վատթարացվել են հավակնորդների իրավունքները:»: