«Դա մարգարեն է արել». Չեչնիայի բարձրաստիճան պաշտոնյաները ճաղատացել են` հետևելով Կադիրովի օրինակին

 Չեչնիայի ղեկավար Ռամզան Կադիրովի կողմից գլուխը սափրելուց հետո նրա օրինակին են հետևել երկրի շատ պաշտոնյաներ և պետական ծառայողներ: Այս մասին տեղեկացնում է kavkazr.com կայքը:

Ապրիլի 20-ին հանրապետությունում կորոնավիրուսի տարածման դեմ պայքարի օպերատիվ շտաբի նիստում տեղի բնակիչներից մեկը Կադիրովին հարցրել էր գեղեցկության սրահների բացման անհրաժեշտության մասին: Կադիրովը պատասխանել էր, որ լավ կլինի բոլորը սափրեն գլուխները:

Արդեն հաջորդ օրը` ապրիլի 21-ին, Կադիրովը սոցցանցերում հայտնվել է սափրած գլխով: Նա կոչ է արել բոլորին հետևել իր օրինակին, քանի որ գեղեցկության սրահները փակ են, իսկ տներում վարսավիրներ չկան:

«Այսպես արել են մեր նախնիները, և որ գլխավորն է՝ երեքշաբթիից չորեքշաբթի այսպես արել է մարգարեն»,-հայտարարել է Չեչնիայի ղեկավարը:

Կադիրովի առաջարկին հետևել են Չեչնիայի առաջին դեմքերը, նրանք նույնպես լուսանկարներ են հրապարակել սափրած գլուխներով:

Հանրապետության ղեկավարի օրինակին հետևել են նաև ուժային ծառայությունների մի շարք աշխատակիցներ:

Ապրիլի սկզբին Չեչնիայում պարետային ժամ է հայտարարվել: Ապրիլի 17-ին հանրապետությունում խիստ կարանտին է հայտարարվել հանգստյան օրերին:

Լուսանկարները կարող եք դիտել այստեղ: