Մարտի 14-ից մինչև այսօր Հայաստան է վերադարձել մոտ 22 հազար ՀՀ քաղաքացի. ԱԳ նախարարի տեղակալ (տեսանյութ)

 ՀՀ քաղաքացու՝ հայրենիք վերադարձն առաջնային խնդիր է մեզ համար: Մենք պետք է ապահովենք նրանց վերադարձն ու անվտանգությունը: Այս մասին այսօր Կառավարության մամուլի կենտրոնում տեղի ունեցող ասուլիսի ժամանակ ասաց ՀՀ ԱԳ նախարարի տեղակալ Ավետ Ադոնցը՝ ներկայացնելով COVID-19-ի պայքարի շրջանակում ԱԳ նախարարության հիմնական աշխատանքները:

Ադոնցը նշեց, որ նախարարությունն ապահովում է ՀՀ բոլոր այն քաղաքացիների ցանկությունը, որոնք գտնվում են արտերկրում և ուզում են վերադառնալ հայրենիք: Նրա խոսքով՝ կարևոր է նաև, որ կարգավորեն բեռնափոխադրման հարցերը, քանի որ համավարակի ընթացքում ներկրվում են նաև առողջապահական պարագաներ, որոնց անհրաժեշտությունը խիստ կարևոր է:

«Մարտի 14-ից մինչև այսօր Հայաստան է վերադարձել մոտ 22 հազար ՀՀ քաղաքացի, աշխարագրությունը բավական լայն է: Աշխատանքներն իրականացվում են ՀՀ կառավարության, պարետատան, Առողջապահության նախարարության, Քաղավիացիայի կոմիտեի համագործակցությամբ»,- ասաց ԱԳ փոխնախարարը:

Ադոնցը նշեց, որ հաճախ են լինում վերադարձի հետ կապված խնդիրներ, օրինակ՝ կարող է թռիչքը ձգձգվել, բայց ըստ նրա՝ պատճառներն օբյեկտիվ են, քանի որ գործողությունները բազմաշերտ են:

«Այս գործընթացում մոտ 200 դիվանագետ է ներգրավված, որոնք աշխատում են արտերկրում: Բացի նրանց գործողություններից, այլ գործողություն չի կարող արդյունավետ լինել»,-նշեց նախարարի տեղակալը:

Մանրամասները՝ տեսանյութում: