Fitch-ը վերանայել է Երեւանի էմիտենտ դեֆոլտի երկարաժամկետ վարկանիշը «կայունից» «բացասական»

Fitch միջազգային վարկանշային գործակալությունը վերանայել է Երեւան քաղաքի էմիտենտ դեֆոլտի ազգային արժույթով եւ արտարժույթներով երկարաժամկետ վարկանիշը «կայունից» «բացասական» եւ հաստատել «BB-» մակարդակի վրա: Էմիտենտ դեֆոլտի կարճաժամկետ վարկանիշը հաստատվել է «В» մակարդակի: Այս մասին ասվում է գործակալության տարածած մամուլի հաղորդագրության մեջ:

Ավելի վաղ հաղորդել էինք, որ Fitch-ը վերանայել է Հայաստանի կառավարության արտարժույթով, ինչպես նաեւ ազգային արժույթով երկարաժամկետ պարտավորությունների թողարկման սուվերեն վարկանիշները` դրանք պահպանելով «BB-» մակարդակի վրա, «դրականը» փոխարինելով «բացասական» հեռանկարով՝ պայմանավորված կորոնավիրուսի ազդեցությամբ:

Երեւան քաղաքի վարկանիշի հաջորդ վերանայումը նախատեսվում է մայիսի 22-ին, Fitch-ն ակնկալում է, որ կորոնավիրուսի համավարակի պատճառով առաջիկա ամիսներին իրավիճակը կարող է վատանալ՝ տնտեսական ակտիվության թուլացման, կառավարության կողմից սահմանափակող միջոցառումների պահպանման կամ երկարաձգման ֆոնին:

Fitch-ը Երեւանը դասակարգում է որպես B տեսակի ենթաազգային կառույց, ինչը նշանակում է, որ պարտքի սպասարկումը պետք է փակել դրամական հոսքերի հաշվին տարեկան կտրվածքով: Ուստի ռիսկի պրոֆիլը գնահատվում է որպես «ավելի թույլ մակարդակ», ինչն արտացոլում է «ավելի թույլ մակարդակի» չորս առանցքային գործոն՝ եկամուտների կայունություն եւ հարմարեցում, ծախսերի հարմարեցում եւ պարտքային պարտավորությունների ճկունություն, իրացվելիություն: