Գերմանիան երկուշաբթիից սկսած կմեղմի կարանտինային սահմանափակումները, ոչ մեծ խանութները կվերաբացվեն

 Գերմանիայի իշխանությունները նոր տեսակի կորոնավիրուսի համավարակի առաջացրած ճգնաժամային իրավիճակի ֆոնին առաջին քայլերը կձեռնարկեն կյանքի բնականոն ընթացքին վերադառնալու ուղղությամբ, գրում է The Guardian-ը:

Աղբյուրը մանրամասնում է, որ մեկ ամիս տևած սահմանափակումներից և կարանտինային ռեժիմից հետո երկրի որոշ շրջաններում երկուշաբթիից սկսած կվերաբացվեն ոչ մեծ խանութները: Բացվելու համար անհրաժեշտ նախապայման է, որպեսզի դրանց մակերեսը 800 քմ-ից ավել չլինի:

Իշխանությունների փոխանցմամբ՝ նոր տեսակի կորոնավիրուսի համավարակի տարածումը երկրում այժմ վերահսկելի է:

Հայտնի է, որ երկրում գրանցվել է վարակման 145 742, մահվան 4642 և ապաքինման 91 500 դեպք:

Նոր տեսակի կորոնավիրուսով վարակվածների թիվն ամբողջ աշխարհում 2 407 439 է, մահացել է 165 073 մարդ: Առողջապահության համաշխարհային կազմակերպությունը կորոնավիրուսի համավարակ է հայտարարել մարտի 11-ին: Վիրուսը տարածվել է 210 երկրում: Համաճարակի բռնկման մասին Չինաստանի իշխանություններն ԱՀԿ-ին հայտնել են դեկտեմբերի 31-ին: