Ժամանակին կրծքով պաշտպանել ենք «Հայկական Ժամանակ»-ը. սրա՞ համար. Հրանտ Բարգրատյան

ՀՀ նախկին վարչապետ Հրանտ Բագրատյանը ֆեյսբուքյան իր էջում գրառում է կատարել` անդրադառնալով «Հայելի» մամուլի ակումբում տեղի ունեցած միջադեպին: Բագրատյանը նշել է, որ խստորեն դատապարտում է մամուլի դեմ հարձակումները:

«Խստորեն դատապարտում եմ մամուլի, մասնավորապես, «Հայելի» ակումբի, դեմ հարձակումները: Ժամանակին կրծքով պաշտպանել ենք, օրինակ, «Հայկական Ժամանակ»-ը: Սրա՞ համար»,- գրել է նա:

Հիշեցնենք հոկտեմբերի 5-ին չորս երիտասարդ պաշարել էր «Հայելի» մամուլի ակումբը։ Նրանք ձվեր էին նետել ակումբի դռներին ու պաստառներ փակցրել։ Նրանցից մեկը, որը ներկայացել է որպես քաղաքացի Դավիթ Հովհաննիսյան, ասել էր, որ պահանջում է փակել լրատվամիջոցը։

Նրանք նշել են, որ նման ակցիայի պատճառը Hayeli.am կայքով հրապարակված «Ալիևի ուշացած, բայց հուժկու պատասխանը Փաշինյանին» վերտառությամբ հոդվածն է։ Ակցիայի մասնակիցների խոսքով՝ նրանք պատրաստվում էին նույնը անել ակումբի ներսում, եթե դուռը բաց լիներ։