Փաշինյանի հայտարարությունը բլեֆ էր. ոստիկանների աշխատավարձը ոչ թե ավելացել, այլ նվազել է

Ոստիկանների աշխատավարձն իրականում ոչ թե ավելացել է, այլ նվազել: Այս մասին Facebook-ի իր էջում գրել է քաղաքագետ Գագիկ Համբարյանը, ով իր գրառումը վերնագրել է. «Ոստիկանությունում աշխատավարձերի բարձրացման իրականությունը եւ բլեֆը»:

Նա, մասնավորապես, նշել է.

«Հայաստանի վարչապետ Նիկոլ Փաշինյանի սոցիալ-տնտեսական ոլորտում եզակի ձեռքբերումներից մեկը՝ ոստիկանության աշխատակիցների աշխատավարձերի միջինը 20 տոկոսով բարձրացումն էր, որի մասին պարոն Փաշինյանը հպարտորեն հայտարարեց սույն թվականի ապրիլի 17-ին:

Սակայն այսօր պարզեցի, որ աշխատավարձերի բարձրացում, որպես այդպիսին, տեղի չի ունեցել: Հիմա բացատրեմ` ինչու եմ եկել այդ եզրահանգմանը: Այսպես, ոստիկանության աշխատակիցներից մեկի հետ զրույցում պարզվեց, որ մինչեւ ոստիկանների աշխատավարձերի բարձրացման մասին հայտարարությունը, ոստիկանության աշխատակիցները եռամսյակը մեկ ստացել են հավելավճար՝ մեկ ամսվա աշխատավարձի չափով:

Փաշինյանի կողմից ոստիկանների աշխատավարձերի միջինը 20 տոկոսով բարձրացնելուց հետո այդ հավելավճարների տրամադրումը դադարեցվել է, որի արդյունքում, եթե վերցնենք տարեկան կտրվածքով, ապա ոստիկանների աշխատավարձերը իրականում նվազել են, ոչ թե բարձրացել:

Ստացվում է` պարոն Փաշինյանի հայտարարությունն ընդամենը բլեֆ էր եւ ոստիկանները ոչ մի պատճառ չունեն ուրախանալու, որ իրենց աշխատավարձերը իբր բարձրացվել են: Բացի այդ, եթե այդ «բարձրացմանը» գումարենք նաեւ ոստիկանների վրա հաճախակի դարձած հարձակումները տրանսգենդերների եւ տարատեսակ այլ այլասերվածների կողմից, ապա ոստիկաններին ստեղծված իրավիճակի համար կարելի է ցավակցել»: